حيدرآباد جي صنعتي علائقن ۾ بجلي جي مسلسل ۽ بنا رڪاوٽ فراهمي ڪاروباري سرگرمين لاءِ انتهائي ضروري آهي،نديم احمد صديقي

 حيدرآباد  (محبوب حسين بوزدار )  حيدرآباد چيمبر آف اسمال ٽريڊرز اينڊ اسمال انڊسٽري جي صدر نديم احمد صديقي چيو آهي ته حيسڪو جي مختلف صنعتي فيڊرن تي غيراعلانيه لوڊشيڊنگ، ڊگهي شٽ ڊائون ۽ بجلي بروقت بحال نه ٿيڻ سبب حيدرآباد جي واپارين، صنعتڪارن ۽ دڪاندارن کي سخت مشڪلاتن کي منهن ڏيڻو پئجي رهيو آهي. خاص طور تي سائيٽ، انڊس، هوسڙي ۽ فضل گلزار فيڊرن تي بجلي جي صورتحال انتهائي ڳڻتي جوڳي آهي. هن انهن خيالن جو اظهار حيسڪو چيف فيض الله ڏاهري سان سندس آفيس ۾ ملاقات دوران ڪيو، جتي حيدرآباد چيمبر جي وفد بجلي جي فراهمي بابت درپيش مسئلا تفصيل سان پيش ڪيا. نديم احمد صديقي چيو ته حيدرآباد جي صنعتي علائقن ۾ بجلي جي مسلسل ۽ بنا رڪاوٽ فراهمي ڪاروباري سرگرمين لاءِ انتهائي ضروري آهي. غيراعلانيه لوڊشيڊنگ ۽ بار بار شٽ ڊائون سبب صنعتن جي پيداواري صلاحيت متاثر ٿي رهي آهي، جڏهن ته بجلي جي بحالي ۾ دير سبب ڪاروباري ادارن کي مالي نقصان برداشت ڪرڻو پئجي رهيو آهي. شام جي وقت بجلي جي بندش سان مارڪيٽن ۽ دڪانن جون سرگرميون پڻ متاثر ٿين ٿيون، جيڪي واپارين لاءِ ڪاروبار جا اهم ترين وقت آهن. هن وڌيڪ چيو ته صنعتي ۽ واپاري ادارن کي بجلي جي فراهمي ۾ درپيش مسئلن جو فوري حل ضروري آهي، ڇاڪاڻ ته صنعتن جو نقصان ڪنهن به صورت ۾ برداشت نٿو ڪري سگهجي. حيسڪو کي گهرجي ته بجلي جي فراهمي جو نظام بهتر بڻائيندي غيراعلانيه بندشن ۽ غيرضروري ڊگهن شٽ ڊائون جو خاتمو ڪري. ان موقعي تي سينيئر نائب صدر محمد فهد ميان، نائب صدر عرفان عاربياني، اڳوڻو صدر سليم الدين قريشي، چيمبر حيسڪو سب ڪميٽي جي ڪنوينر سهيل ميمڻ ۽ حيدرآباد سائيٽ ايسوسيئيشن جي سينيئر نائب چيئرمين عامر شهاب پڻ پنهنجن خيالن جو اظهار ڪندي لاڳاپيل فيڊرن جي صورتحال بهتر بڻائڻ، بجلي جي بندش جو مدو گهٽائڻ ۽ صنعتي ۽ واپاري علائقن کي ترجيحي بنيادن تي بجلي فراهم ڪرڻ تي زور ڏنو. حيسڪو چيف فيض الله ڏاهري وفد جا مسئلا غور سان ٻڌندي لاڳاپيل آفيسرن کي هدايت ڪئي ته سائيٽ، انڊس، هوسڙي ۽ فضل گلزار سميت متاثر فيڊرن تي بجلي جي فراهمي بابت مسئلن جو هڪ مهيني اندر ازالو ڪيو وڃي. هن يقين ڏياريو ته لاڳاپيل ٽيم انهن مسئلن جي حل لاءِ اثرائتا قدم کڻندي. هن چيو ته صنعتون حيسڪو جون اسٽار ڪسٽمرز آهن ۽ انهن کي سهولتون فراهم ڪرڻ حيسڪو جي اولين ترجيحن ۾ شامل آهي. حيسڪو چيف وڌيڪ چيو ته 4 ڊسمبر تي ٻيهر اجلاس منعقد ڪيو ويندو، جنهن ۾ هڪ مهيني دوران کنيل قدمن ۽ اڳڀرائي جو جائزو ورتو ويندو. جيڪڏهن مقرر وقت اندر مسئلا حل نه ٿيا ته صورتحال موجب وڌيڪ فيصلا ڪيا ويندا. حيدرآباد چيمبر جي صدر نديم احمد صديقي حيسڪو چيف پاران مسئلن جي حل لاءِ ڏنل هدايتن جي آجيان ڪندي اميد ظاهر ڪئي ته لاڳاپيل آفيسر مقرر وقت اندر عملي قدم کڻي واپارين ۽ صنعتڪارن کي درپيش مشڪلاتن جو خاتمو ڪندا. اجلاس ۾ حيدرآباد چيمبر جا سينيئر ميمبر شاهد قائم خاني، اسلم باواڻي، شريف پونجاڻي ۽ حيدرآباد دال ملز ايسوسيئيشن جو صدر صلاح الدين قريشي پڻ شامل هئا.