اسلام آباد: وفاقي وزارت آءِ ٽي پاڪستان ڊجيٽل اٿارٽي کي ملڪ جي مرڪزي ڊيٽا ريگيوليٽر اٿارٽي بڻائڻ جو فيصلو ڪيو آهي، جنهن تحت وفاقي ادارن ۾ ڊيٽا گورننس جي نگراني جو نظام وڌيڪ مضبوط بڻايو ويندو.
دستاويزن موجب، پاڪستان ڊجيٽل اٿارٽي وفاقي ادارن ۾ ڊيٽا گورننس جي نگراني ڪندي، جڏهن ته سڀني وفاقي ادارن کي قومي ڊيٽا گورننس فريم ورڪ تي عملدرآمد يقيني بڻائڻو پوندو.
تجويز ڪيل نيشنل ڊيٽا گورننس پاليسي 2026 تحت پاڪستان ڊجيٽل اٿارٽي کي وسيع اختيار ڏنا ويندا، جيئن اها سرڪاري ادارن ۾ ڊيٽا جي انتظام، استعمال، تحفظ ۽ شيئرنگ بابت مقرر ڪيل پاليسين تي عملدرآمد کي يقيني بڻائي سگهي.
پاليسي موجب، پاڪستان ڊجيٽل اٿارٽي نيشنل اوپن ڊيٽا پورٽل ۽ نيشنل ڊيٽا ايڪسچينج پليٽ فارم جي به نگراني ڪندي، جنهن جو مقصد مختلف وفاقي ادارن وچ ۾ ڊيٽا جي محفوظ ۽ مؤثر مٽاسٽا کي هٿي ڏيڻ ۽ ڊجيٽل گورننس جي نظام کي وڌيڪ بهتر بڻائڻ آهي.
حڪومتي ذريعن موجب، هن قدم سان وفاقي ادارن ۾ ڊيٽا جي انتظام، شفافيت ۽ ڊجيٽل خدمتن جي معيار ۾ بهتري آڻڻ ۾ مدد ملندي، جڏهن ته جديد ٽيڪنالاجي جي استعمال ذريعي سرڪاري ڪارڪردگي کي وڌيڪ مؤثر بڻائڻ جو مقصد پڻ حاصل ڪيو ويندو.
