حيدرآباد ۾ اقبال ڊي اسڪولز اينڊ ڪاليجز اسپورٽس فيسٽيول جون تياريون جاري

حيدرآباد(محبوب حسين ٻوزدار) حڪومتِ سنڌ جي راندين ۽ نوجوانن جي معاملن واري کاتي (Sports & Youth Affairs Department Sindh) جي اهتمام هيٺ حيدرآباد ۾ 11 کان 13 نومبر تائين اقبال ڊي اسڪولز اينڊ ڪاليجز اسپورٽس فيسٽيول منعقد ڪيو ويندو.هن اسپورٽس فيسٽيول جي انعقاد جو بنيادي مقصد تعليمي ادارن جي شاگردن ۽ شاگردياڻين کي راندين جي ميدان ۾ پنهنجي صلاحيتن جو مظاهرو ڪرڻ جا موقعا فراهم ڪرڻ، نوجوان نسل ۾ راندين جي ثقافت کي هٿي وٺرائڻ ۽ صحتمند توڙي مثبت سرگرمين جي حوصلا افزائي ڪرڻ آهي.اسپورٽس فيسٽيول ضلعي اسپورٽس آفيسر حيدرآباد ميڊم مريم ڪيريو جي نگرانيءَ ۾ منعقد ڪيو ويندو. فيسٽيول ۾ مختلف اسڪولن ۽ ڪاليجن جا شاگرد ۽ شاگردياڻيون شرڪت ڪندا، جتي نوجوان رانديگر مختلف راندين جي مقابلن ۾ پنهنجي صلاحيتن، محنت، لگن ۽ راندين جي جذبي جو ڀرپور مظاهرو ڪندا.ضلعي اسپورٽس آفيسر ميڊم مريم ڪيريو جي نگرانيءَ هيٺ فيسٽيول کي بهترين انداز ۾ منظم ڪرڻ ۽ ڪاميابيءَ سان منعقد ڪرائڻ لاءِ ضروري انتظام ۽ قدم کنيا پيا وڃن.
هي اسپورٽس فيسٽيول نوجوان رانديگرن جي حوصلا افزائي، راندين جي سرگرمين کي هٿي وٺرائڻ ۽ تعليمي ادارن ۾ راندين جي ثقافت کي وڌيڪ مضبوط بڻائڻ جي حوالي سان هڪ اهم اڳڀرائي ثابت ٿيندو.حيدرآباد ۾ اهڙين راندين جي سرگرمين سان نوجوان نسل کي مثبت سرگرمين ڏانهن راغب ڪرڻ سان گڏوگڏ نظم و ضبط، برداشت، گڏيل سهڪار، ٽيم ورڪ ۽ پاڻ ۾ هم آهنگيءَ جي جذبن کي پڻ هٿي ملندي.