واٽس ايپ پنهنجي ميسيجنگ پليٽ فارم ۾ وڏي تبديلي آڻڻ جي تياري ڪري رهيو آهي، جنهن سان ايپ جو استعمال انسٽاگرام جهڙو محسوس ٿيندو۔
رپورٽن موجب ڪمپني ايپ جي مرڪزي يا چيٽ ٽيب ۾ اهم اپڊيٽ آڻڻ تي ڪم ڪري رهي آهي۔ هن تبديلي کان پوءِ يوزرن کي پنهنجي ڪانٽيڪٽس جا اسٽيٽس سڌو چيٽ اسڪرين جي مٿان نظر ايندا، بلڪل انسٽاگرام اسٽوريز وانگر۔
ان نئين فيچر جو مقصد يوزر تجربي کي وڌيڪ آسان ۽ دلچسپ بڻائڻ آهي، جيئن ماڻهو بغير الڳ ٽيب کولڻ جي سڌو اسٽيٽس ڏسي سگهن۔ هن سان اسٽيٽس فيچر جو استعمال به وڌڻ جو امڪان آهي۔
هڪ رپورٽ مطابق هي فيچر هن وقت اينڊرائيڊ ڊوائيسز لاءِ واٽس ايپ جي بيٽا ورزن ۾ آزمائشي مرحلي ۾ آهي، جتي چونڊيل يوزرس ان کي استعمال ڪري رهيا آهن۔
بيٽا ٽيسٽنگ دوران فيچر جي ڪارڪردگي، ڊيزائن ۽ يوزر فيڊ بيڪ جو جائزو ورتو ويندو، جنهن کان پوءِ ان کي عام يوزرس لاءِ متعارف ڪرايو ويندو۔
جيڪڏهن هي تبديلي لاڳو ٿي وئي ته واٽس ايپ ۾ ميسيجنگ ۽ سوشل ميڊيا فيچرز جو ميلاپ وڌيڪ واضح ٿي ويندو، جيڪو يوزرن جي روزاني استعمال جي طريقي کي به تبديل ڪري سگهي ٿو۔
