ڪراچي: دنيا جي مشهور پيغام رساني واري ايپليڪيشن واٽس ايپ پنهنجي صارفين جي رازداري (پرائيويسي) کي وڌيڪ مضبوط بڻائڻ لاءِ يوزر نيم فيچر متعارف ڪرائڻ جو اعلان ڪيو آهي، جنهن سان هاڻي ٻين سان رابطي لاءِ هر ڀيري فون نمبر شيئر ڪرڻ جي ضرورت نه پوندي.
واٽس ايپ پاران جاري ڪيل تفصيل موجب، نئين فيچر کان پوءِ صارف پنهنجي لاءِ هڪ منفرد يوزر نيم چونڊي سگهندا، جنهن جي ذريعي هو پنهنجي خاندان، دوستن يا ٻين ماڻهن سان رابطي ۾ اچي سگهندا، جڏهن ته سندن فون نمبر لڪل رهندو.
رپورٽ موجب، هي فيچر خاص طور انهن صارفين لاءِ فائديمند هوندو، جيڪي پنهنجي ذاتي فون نمبر کي غيرضروري ماڻهن کان محفوظ رکڻ چاهين ٿا. يوزر نيم استعمال ڪرڻ سان سڌو فون نمبر ظاهر ڪرڻ جي ضرورت ختم ٿي ويندي.
ميٽا وضاحت ڪندي چيو آهي ته فون نمبر تائين رسائي محدود ٿيڻ جو مطلب اهو هوندو ته جڏهن ڪو صارف ڪنهن واٽس ايپ گروپ ۾ شامل ٿيندو يا ڪنهن نئين شخص يا اداري کي پهريون ڀيرو پيغام موڪليندو ته سندس فون نمبر پاڻمرادو ٻين صارفين سان شيئر نه ٿيندو.
بيان موجب، هڪ ڀيرو صارف پنهنجو يوزر نيم چونڊي وٺندو ته پوءِ جيڪو به شخص واٽس ايپ تي ساڻس رابطو ڪرڻ چاهيندو، ان لاءِ صحيح يوزر نيم ڄاڻڻ ضروري هوندو.
ميٽا وڌيڪ ٻڌايو آهي ته دنيا ۾ واٽس ايپ جا لڳ ڀڳ 3 ارب صارف موجود آهن، تنهن ڪري ممڪن آهي ته ڪيترن ئي ماڻهن کي پنهنجي پسند جو يوزر نيم دستياب نه ٿي سگهي، ڇاڪاڻ ته هر يوزر نيم منفرد هوندو.
ڪمپني اهو پڻ واضح ڪيو آهي ته مشهور شخصيتن، سرڪاري اعليٰ عملدارن ۽ ٻين اهم نالن سان لاڳاپيل يوزر نيم عام صارفين لاءِ دستياب نه هوندا، جيئن جعلي اڪائونٽن، سڃاڻپ جي جعلسازي ۽ آن لائين فراڊ کان بچي سگهجي.
واٽس ايپ موجب، هي نئون فيچر ڪنٽينٽ ڪريئيٽرز، ننڍن ڪاروبارن ۽ ادارن لاءِ به فائديمند ثابت ٿيندو، ڇو ته هو پنهنجا اڳ ۾ موجود انسٽاگرام يا فيس بڪ وارا يوزر نيم واٽس ايپ تي به استعمال ڪري سگهندا، جنهن سان سندن سڃاڻپ برقرار رهندي ۽ صارفين لاءِ کين ڳولڻ وڌيڪ آسان بڻجي ويندو.
واٽس ايپ طرفان فيچر جي باضابطه دستيابي جي تاريخ اڃا ظاهر نه ڪئي وئي آهي، جڏهن ته اميد آهي ته ايندڙ اپڊيٽن ذريعي اهو فيچر مرحليوار دنيا جي مختلف ملڪن ۾ صارفين لاءِ جاري ڪيو ويندو.
