پاڪستان-چين دوستي جا 75 سال مڪمل ٿيڻ تي سنڌ زرعي يونيورسٽي ۾ شاندار تقريب، زرعي تحقيق ۽ تعليمي سهڪار تي زور

ٽنڊوڄام (محبوب حسين بوزدار بيوروسنڌھ) سنڌ زرعي يونيورسٽي ٽنڊوڄام ۾ اسلامي جمهوريه پاڪستان ۽ عوامي جمهوريه چين وچ ۾ سفارتي لاڳاپن جا 75 سال مڪمل ٿيڻ جي موقعي تي هڪ شاندار تقريب ڪوٺائي وئي، جتي انتظامي ۽ ادارن جي سربراھن ٻنهي ملڪن جي تاريخي دوستي، ڀائيواري ۽ گڏيل ڪاميابين بابت پنھنجا خيال پيش ڪيا، سنڌ زرعي يونيورسٽي جي وائيس چانسلر پروفيسر ڊاڪٽر الطاف علي سيال پنهنجي صدارتي خطاب ۾ چيو ته پاڪستان ۽ چين وچ ۾ مضبوط لاڳاپن سبب تعليم، زراعت، سائنسي تحقيق ۽ ثقافتي مٽاسٽا جي شعبن ۾ ٻنهي ملڪن جي ماهرن ۽ نوجوانن لاءِ نوان موقعا پيدا ٿيا آهن، جيڪي پائيدار ترقي ۽ خوشحالي کي ھٿي ڏيڻ ۾ اهم ڪردار ادا ڪيو آھي، هن چيو ته سنڌ زرعي يونيورسٽي چين جي مختلف يونيورسٽين سان مفاهمتي يادداشتن (ايم او يوز) تي صحيحون ڪيون آهن، جڏهن ته شاگردن جي صلاحيتن ۾ واڌ لاءِ چين ۾ تربيتي پروگرام پڻ شروع ڪيو ويو آهي، هن وڌيڪ چيو ته ان پروگرام ذريعي شاگردن کي جديد تحقيقي طريقن، زرعي ٽيڪنالاجي ۽ تعليمي تجربن بابت سکيا ملندي، جنهن سان زرعي ۽ ماحولياتي چئلينجن کي منهن ڏيڻ، خوراڪي تحفظ کي بهتر بڻائڻ ۽ ڪميونٽي لاءِ پائيدار ترقي کي يقيني بڻائڻ ۾ مدد ملندي۔ سندس چوڻ هو ته چين ۽ سنڌ جي زرعي تحقيقي ۽ سائنسي ادارن جا گڏيل قدم هارين جي سهائتا، ڳوٺاڻين برادرين کي بااختيار بڻائڻ ۽ ڄاڻ تي ٻڌل زرعي شعبي جي قيام ۾ اهم ثابت ٿيندا۔ان موقعي تي ايگريڪلچر ريسرچ سنڌ جي ڊائريڪٽر جنرل ڊاڪٽر مظهرالدين ڪيريو چيو ته ٽيڪنالاجي جي استعمال، فصلن جي تحقيق ۽ صلاحيت وڌائڻ وارن گڏيل منصوبن مقامي هارين کي فائدو پهچايو آهي ۽ خوراڪي تحفظ کي وڌيڪ مضبوط بڻايو آهي، تقريب جي شروعات ۾ پروفيسر ڊاڪٽر محمد اسماعيل ڪنڀر مهمانن کي ڀليڪار ڪندي چيو ته پاڪستان ۽ چين جا لاڳاپا هماليه کان اوچا، سمنڊن کان گهرا ۽ ماکيءَ کان وڌيڪ مٺا آهن، جڏهن ته ٻنهي ملڪن وچ ۾ گڏيل اعتماد، احترام ۽ گڏيل ويزن تي ٻڌل دوستي ساڍن ستن ڏهاڪن تي پکڙيل آهي، تقريب جي پڄاڻي تي ڊائريڪٽر ايگريڪلچر ريسرچ ثناءُ الله سولنگي خطاب ڪندي مهمانن، استادن، شاگردن ۽ منتظمن جا ٿورا مڃيا۔ تقريب ۾ شاگردن، استادن، آفيسرن ۽ ملازمن وڏي انگ ۾ شرڪت ڪئي۔