آمريڪي ميڊيا موجب اسلام آباد ۾ ايران ۽ آمريڪا جي وچ ۾ جاري اهم مذاڪرات آچر تي به جاري رهي سگهن ٿا، جنهن مان ظاهر ٿئي ٿو ته ڳالهين جو عمل اڃا حتمي نتيجي تي نه پهتو آهي ۽ وڌيڪ مشاورت جي ضرورت آهي.
آمريڪي نشرياتي اداري سي اين اين رپورٽ ڪيو آهي ته پاڪستاني ذريعن جو چوڻ آهي ته ايران-آمريڪا ڳالهين جو سلسلو اڄ رات ۽ ايندڙ ڏينهن آچر تائين به جاري رهي سگهي ٿو. اهي ڳالهين پاڪستان جي ميزباني هيٺ ٿي رهيون آهن، جتي پاڪستان ٻنهي ملڪن وچ ۾ ثالث جو ڪردار ادا ڪري رهيو آهي.
رپورٽن موجب، پاڪستان خطي ۾ امن ۽ استحڪام لاءِ اهم سفارتي ڪوششون ڪري رهيو آهي ۽ ايران ۽ آمريڪا جهڙن ملڪن کي هڪ ميز تي ويهارڻ وڏي ڪاميابي سمجهي پئي وڃي. ٻنهي ملڪن وچ ۾ سالن کان جاري تڪرار کي نظر ۾ رکندي، اهڙيون ڳالهيون وقت وٺندڙ هونديون آهن.
ٻئي پاسي وفاقي وزير قانون اعظم نذير تارڙ چيو آهي ته ايران ۽ آمريڪا جي وچ ۾ لڳ ڀڳ 47 سالن جي ڇڪتاڻ رهي آهي، جنهن کي مختصر وقت ۾ ختم ڪرڻ ممڪن ناهي. هن چيو ته ڪيترن ئي معاملن تي فيصلو ڪرڻ لاءِ ڊگهي ۽ سنجيده ڳالهين جي ضرورت هوندي آهي، ۽ اهو عمل ڪڏهن ڪڏهن ڪيترن ئي دورن تي مشتمل هوندو آهي.
هن وڌيڪ چيو ته ٻنهي ڌرين کي خبر آهي ته ڪٿي اڳتي وڌڻو آهي ۽ ڪٿي رڪجڻ گهرجي، ۽ اهي پنهنجي پنهنجي ملڪن ۾ قيادت سان مسلسل رابطي ۾ آهن. ڪنهن به اهم فيصلي کان اڳ ٻئي ڌريون پنهنجي حڪومتن سان صلاح مشورا ڪري رهيون آهن ته جيئن ڪنهن به معاهدي تي پهچڻ وقت مڪمل اتفاق راءِ حاصل ٿي سگهي.
اعظم نذير تارڙ موجب شروعاتي طور تي 10 اپريل تي هڪ ڏينهن جي ڳالهين جو منصوبو هو، پر جيڪڏهن موجوده ڳالهين جو سلسلو مثبت رهيو ته اهو عمل وڌيڪ ڏينهن تائين وڌي سگهي ٿو. هن اميد ظاهر ڪئي ته جاري سفارتي ڪوششون آخرڪار ڪنهن مثبت نتيجي تي پهچنديون، جنهن سان خطي ۾ امن ۽ استحڪام کي هٿي ملندي۔
