اوپن اي آءِ پنهنجي مشهور اي آءِ چيٽ بوٽ چيٽ جي پي ٽي ۾ هڪ اهم ۽ خاموش تبديلي ڪئي آهي، جنهن جو مقصد يوزر انٽرفيس کي وڌيڪ آسان ۽ تيز بڻائڻ آهي۔
نئين اپڊيٽ موجب هاڻي پلس، پرو ۽ بزنس پلان استعمال ڪندڙن لاءِ مختلف ماڊلز کي تبديل ڪرڻ وڌيڪ سادو ٿي ويو آهي۔ اڳ ۾ هي آپشن اسڪرين جي مٿي مينيو ۾ لڪل هوندو هو، جنهن سبب ڪيترن صارفين کي ان جي ڄاڻ نه هوندي هئي، پر هاڻي اهو سڌو ان ئي جاءِ تي موجود هوندو جتي صارف پنهنجو پرومپٽ لکندا آهن۔
نئين سسٽم ۾ صارف هاڻي ٽي بنيادي آپشن چونڊي سگهن ٿا: انسٽنٽ، ٿنڪنگ ۽ ڪنفيگر۔
انسٽنٽ آپشن تيزي سان جواب ڏيڻ لاءِ آهي ۽ اهو GPT-5.3 استعمال ڪري ٿو، جڏهن ته ٿنڪنگ آپشن وڌيڪ تفصيلي ۽ پيچيده سوالن لاءِ آهي ۽ اهو GPT-5.5 تي هلندو آهي۔ ڪنفيگر آپشن ۾ سسٽم پاڻمرادو فيصلو ڪري ٿو ته ڪهڙو ماڊل بهتر نتيجو ڏيندو، يعني اهو ڪم جي نوعيت مطابق پراڻن ۽ نون ماڊلز مان چونڊ ڪري ٿو۔
ماهرن جو چوڻ آهي ته هي تبديلي استعمال ڪندڙن لاءِ وقت بچائڻ ۽ بهتر تجربو ڏيڻ لاءِ ڪئي وئي آهي، ڇو ته هاڻي هر ماڻهو پنهنجي ضرورت مطابق جلدي ماڊل تبديل ڪري سگهي ٿو۔
مجموعي طور تي هي اپڊيٽ چيٽ جي پي ٽي کي وڌيڪ سمارٽ، تيز ۽ يوزر فرينڊلي بڻائي ٿي، جنهن سان روزاني استعمال ۾ سهولت وڌي ويندي۔
