ميڊرڊ: اسپين جي وزيراعظم پيڊرو سانچيز چيو آهي ته ملڪ ۾ غيرقانوني طور رهندڙ پرڏيهين کي قانوني حيثيت ڏيڻ واري سرڪاري اسڪيم تحت 10 لک کان وڌيڪ ماڻهن درخواستون جمع ڪرائي ڇڏيون آهن.
پرڏيهي ميڊيا موجب، يورپ جي ٻين ملڪن ۾ غيرقانوني لڏپلاڻ خلاف سخت پاليسين جي ابتڙ، اسپين ۾ غيرقانوني طور رهندڙ پرڏيهين کي قانوني حيثيت ڏيڻ جو عمل جاري آهي.
حڪومت موجب، درخواستون جمع ڪرائڻ جو آخري ڏينهن اڱارو هو، جنهن دوران 10 لک کان وڌيڪ ماڻهن هن اسڪيم مان فائدو وٺڻ لاءِ درخواستون جمع ڪرايون.
رپورٽن موجب، جڏهن وزيراعظم پيڊرو سانچيز جي کاٻي ڌر واري حڪومت اپريل ۾ هي منصوبو شروع ڪيو هو ته اندازو لڳايو ويو هو ته لڳ ڀڳ 5 لک ماڻهو، جن مان اڪثريت لاطيني آمريڪي ملڪن سان تعلق رکندڙ هئي، ان مان فائدو حاصل ڪندا.
ميڊرڊ ۾ هڪ تقريب کي خطاب ڪندي پيڊرو سانچيز چيو ته 10 لک کان وڌيڪ درخواستون جمع ٿيڻ ان ڳالهه جو واضح ثبوت آهي ته ماڻهن کي سندن حقن ۽ ذميوارين جي قانوني سڃاڻپ ڏيڻ ڪيترو ضروري هو.
هن چيو ته جڏهن ڪنهن انسان کي سڃاڻپ ۽ قانوني حيثيت کان سواءِ زندگي گذارڻ تي مجبور ڪيو وڃي ٿو ته ان سان رڳو اهو شخص نه، پر سڄو ملڪ متاثر ٿئي ٿو. حڪومت جو مقصد پرڏيهين کي بهتر مستقبل ۽ نوان موقعا فراهم ڪرڻ آهي.
وزيراعظم وڌيڪ چيو ته هو چاهي ٿو ته دنيا اسپين کي اهڙي ملڪ طور سڃاڻي، جيڪو انساني حقن جو احترام ڪري، انهن جو تحفظ ڪري ۽ انهن کي برقرار رکي.
پيڊرو سانچيز جو چوڻ آهي ته اسپين ۾ وڌندڙ عمر واري آبادي، ڳوٺاڻن علائقن مان آبادي جي گهٽتائي، معيشت، سماجي ڀلائي ۽ پينشن جي نظام کي برقرار رکڻ لاءِ پرڏيهي مزدورن ۽ لڏپلاڻ ڪندڙن جي ضرورت آهي.
البته اسپين جي حڪومت واضح ڪيو آهي ته درخواستن جو وڏو انگ ان ڳالهه جي ضمانت ناهي ته سڀني درخواستگذارن کي قانوني حيثيت ڏني ويندي. درخواست ڏيندڙن لاءِ ضروري آهي ته هو ثابت ڪن ته سندن ڪو به ڏوهاري رڪارڊ ناهي ۽ هو 1 جنوري کان اڳ لڳاتار گهٽ ۾ گهٽ پنج مهينا اسپين ۾ رهائش پذير رهيا آهن.
