ميامي: فيفا فٽبال ورلڊ ڪپ 2026 جي رائونڊ آف 32 ۾ دفاعي چيمپيئن ارجنٽينا سخت مقابلي کان پوءِ پهريون ڀيرو ورلڊ ڪپ ۾ حصو وٺندڙ ڪيپ ورڊي کي 3-2 تان شڪست ڏئي پري ڪوارٽر فائنل (رائونڊ آف 16) لاءِ ڪواليفاءِ ڪري ورتو. ميامي ۾ کيڏيل هي ميچ شروعات کان وٺي آخر تائين انتهائي دلچسپ، تيز رفتار ۽ سنسني خيز رهيو، جنهن ۾ ٻنهي ٽيمن شاندار راند جو مظاهرو ڪيو.
ارجنٽينا پنهنجي روايتي جارحاڻي انداز سان ميچ جي شروعات ڪئي ۽ بال تي ڪنٽرول برقرار رکندي مخالف دفاع تي مسلسل دٻاءُ وڌو. ميچ جي 29هين منٽ ۾ عالمي شهرت يافته اسٽار ليونيل ميسي پنهنجي مهارت جو بهترين مظاهرو ڪندي هڪ خوبصورت گول اسڪور ڪيو، جنهن سان ارجنٽينا کي 1-0 جي برتري حاصل ٿي وئي. هلندڙ ورلڊ ڪپ ۾ ميسي جو هي ستون گول هو، جنهن سان هو ٽورنامينٽ جي ٽاپ اسڪوررن ۾ شامل ٿي ويو.
گول کان پوءِ به ارجنٽينا ڪيترائي حملا جاري رکيا، جڏهن ته ڪيپ ورڊي به دفاع تائين محدود رهڻ بدران جوابي حملن ذريعي گول ڪرڻ جون ڪوششون جاري رکيون. پهريون هاف ارجنٽينا جي هڪ گول جي برتري سان ختم ٿيو.
ٻئي هاف جي شروعات کان پوءِ ڪيپ ورڊي وڌيڪ اعتماد سان ميدان ۾ آئي ۽ ارجنٽينا جي دفاع تي دٻاءُ وڌائڻ شروع ڪيو. ان جو نتيجو 59هين منٽ ۾ نڪتو، جڏهن ڊوآرٽي شاندار موو مڪمل ڪندي گول ڪري اسڪور 1-1 برابر ڪري ڇڏيو. هن گول کان پوءِ اسٽيڊيم ۾ موجود شائقين جو جوش ڏسڻ وٽان هو.
برابري کان پوءِ ارجنٽينا کي ٻه انتهائي سونهري موقعا مليا، پر ڪيپ ورڊي جي گول ڪيپر ووزينا شاندار بچاءَ ڪندي ٻنهي موقعن تي يقيني گول ٿيڻ نه ڏنو. سندس بهترين ڪارڪردگي سبب ڪيپ ورڊي ميچ ۾ برقرار رهي ۽ ارجنٽينا کي آساني سان اڳتي وڌڻ نه ڏنو.
مقرر وقت دوران ٻنهي ٽيمن سخت مقابلو جاري رکيو، پر نتيجو نه نڪرڻ سبب ميچ اضافي وقت ۾ داخل ٿي وئي. اضافي وقت ۾ ارجنٽينا پنهنجي تجربي ۽ اعليٰ مهارت جو ڀرپور فائدو ورتو ۽ فيصلائتو گول ڪري هڪ ڀيرو ٻيهر برتري حاصل ڪئي.
ڪيپ ورڊي به همت نه هاري ۽ هڪ ڀيرو ٻيهر مقابلو برابر ڪرڻ لاءِ ڀرپور ڪوششون ڪيون، پر ارجنٽينا جي دفاع مضبوط رهيو ۽ مخالف ٽيم کي وڌيڪ گول ڪرڻ جو موقعو نه ڏنو. آخرڪار ميچ 3-2 جي اسڪور سان ارجنٽينا جي حق ۾ ختم ٿي ۽ ڏکڻ آمريڪي ٽيم پري ڪوارٽر فائنل ۾ پنهنجي جاءِ پڪي ڪري ورتي.
ورلڊ ڪپ ۾ پهريون ڀيرو شرڪت ڪندڙ ڪيپ ورڊي جي ڪارڪردگي کي به وڏي واکاڻ ملي. مضبوط حريف خلاف ٻه ڀيرا خساري مان واپسي ڪري مقابلو برابر ڪرڻ سندن بهادري، عزم ۽ اعليٰ راند جو ثبوت هو. جيتوڻيڪ هو ميچ کٽڻ ۾ ناڪام رهيا، پر پنهنجي شاندار ڪارڪردگي سان دنيا جي فٽبال شائقين جون دليون کٽي ورتيون.
ٻئي طرف ارجنٽينا لاءِ هي فتح وڏي اهميت رکي ٿي، ڇاڪاڻتہ ٽيم هاڻي پري ڪوارٽر فائنل ۾ وڌيڪ مضبوط مخالف سان مقابلي لاءِ تياري ڪندي. ليونيل ميسي جي شاندار فارم ۽ ٽيم جي گڏيل راند ارجنٽينا جي مداحن لاءِ حوصلا افزا اشارو آهي، جڏهن ته ڪوچ به اميد ظاهر ڪئي آهي ته ٽيم ايندڙ مرحلن ۾ به اهڙي ئي بهترين ڪارڪردگي جو سلسلو جاري رکندي.
