پاڪ فضائيه مقامي طور تي تيار ڪيل تيمور ويپن سسٽم جو ڪامياب فلائيٽ ٽيسٽ ڪيو آهي۔
آءِ ايس پي آر موجب تيمور ايئر لانچڊ ڪروز ميزائل 600 ڪلوميٽرن تائين زميني ۽ بحري هدفن کي نشانو بڻائڻ جي صلاحيت رکي ٿو۔
آءِ ايس پي آر جو چوڻ آهي ته گهٽ اوچائي تي پرواز ڪرڻ جي صلاحيت دشمن جي ايئر ۽ ميزائل ڊفينس سسٽمن کي چڪمو ڏيڻ ۾ مؤثر آهي، جڏهن ته تيمور ڪروز ميزائل جديد نيويگيشن ۽ گائيڊنس سسٽم سان ليس آهي۔
آءِ ايس پي آر موجب تيمور ميزائل جي ڪاميابي سان پاڪ فضائيه جي روايتي دفاعي صلاحيتن ۾ نمايان اضافو ٿيو آهي۔ تيمور ويپن سسٽم علائقائي سيڪيورٽي ماحول ۾ پاڪستان جي قابلِ اعتماد دفاع کي وڌيڪ مضبوط بڻائي ٿو۔ تيمور ميزائل جو ڪامياب تجربو قومي سلامتي جي هدفن جي حاصلات جي عڪاسي ڪري ٿو۔ هي ڪاميابي قومي عزم ۽ فني خودڪفالت جو ثبوت آهي۔
آءِ ايس پي آر مطابق فلائيٽ ٽيسٽ جو مشاهدو پاڪ فوجن جي سينيئر آفيسرن ۽ سائنسدانن ڪيو، جڏهن ته ايئر چيف مارشل ظهير احمد بابر سدھو سائنسدانن ۽ انجنيئرن کي مبارڪباد ڏني۔
ٻئي پاسي صدرِ مملڪت پاڪ فضائيه طرفان مقامي طور تي تيار ڪيل تيمور ويپن سسٽم جي ڪامياب تجربي تي خراجِ تحسين پيش ڪيو آهي۔
صدرِ مملڪت چيو ته مقامي سطح تي جديد هٿيارن جي تياري قومي صلاحيت، عزم ۽ اداراتي مهارت جي واضح عڪاسي آهي۔ هي ڪاميابي قومي دفاع ۾ خود انحصاري جي سفر ۾ هڪ اهم اڳڀرائي آهي۔ دفاعي شعبي ۾ جديد ٽيڪنالاجي جو فروغ پاڪستان جي سلامتي ۽ خودمختياري جي تحفظ جي عزم جو اظهار آهي۔
