اسلام آباد: قومي اسيمبلي جي ڪابينا ڊويزن سان لاڳاپيل قائمه ڪميٽي جي اجلاس ۾ اڪثريتي ميمبرن سرڪاري آفيسرن جي دهري شهريت خلاف ووٽ ڏئي ڇڏيو۔
قومي اسيمبلي جي ڪابينا ڊويزن بابت قائمه ڪميٽي جي اجلاس ۾ سول سرونٽس لاءِ دهري شهريت ختم ڪرڻ بابت ايم اين اي نور عالم خان جو بل غور هيٺ آيو۔
نور عالم خان چيو ته دهري شهريت رکندڙ آفيسرن کي شرم اچڻ گهرجي، اهڙو عمل غداري جي برابر آهي۔
دهري شهريت رکندڙ اسپيشل سيڪريٽري اسٽيبلشمينٽ ساره سعيد ٻڌايو ته منهنجي دهري شهريت ڊيڪليئرڊ آهي۔
نور عالم خان چيو ته ڇا توهان کي هڪ ڀيرو به اهو خيال نه آيو ته توهان کي دهري شهريت ڇڏي ڏيڻ گهرجي؟ ان تي سيڪريٽري اسٽيبلشمينٽ چيو ته مان توهان جي دليلن سان متفق آهيان، پر جيڪي آفيسر پيدائشي طور دهري شهريت رکن ٿا، انهن بابت غور ڪيو وڃي۔
نور عالم خان چيو ته پيدائشي دهري شهريت رکندڙ آفيسرن کي به اها شهريت ڇڏڻ گهرجي، جڏهن ته ڪابينا سيڪريٽري ڪامران علي افضل موقف اختيار ڪيو ته جيڪي آفيسر پيدائشي طور دهري شهريت رکن ٿا، تن کي رعايت ملڻ گهرجي۔
ڪميٽي ميمبر شاهده بيگم چيو ته دهري شهريت بابت فيصلو سڀني عهدن لاءِ هڪجهڙو هجڻ گهرجي، ڪنهن لاءِ الڳ قانون نه هجڻ گهرجي۔
اسپيشل سيڪريٽري اسٽيبلشمينٽ چيو ته ان حوالي سان وزيراعظم پاران ٺهيل وفاقي سيڪريٽرين جي ڪميٽي کي آگاهه ڪيو ويو آهي ته پاڪستان جا 21 ملڪن سان اهڙا معاهدا موجود آهن، جن تحت دهري شهريت جي اجازت آهي۔
طاهره اورنگزيب چيو ته مريم اورنگزيب وٽ آسٽريليا جي شهريت هئي، ۽ هن چونڊن ۾ حصو وٺڻ لاءِ آسٽريليا جي شهريت ڇڏي ڏني۔
آغا رفيع الله چيو ته جيڪڏهن سياستدان دهري شهريت سبب نااهل ٿين ٿا ته شام تائين نوٽيفڪيشن جاري ڪيو ويندو آهي، سپريم ڪورٽ اڳ ئي انهن خلاف فيصلو ڏئي چڪي آهي، پر هتي ڪميٽين مٿان ڪميٽيون ٺاهي رهيا آهن۔
نور عالم چيو ته هن پنهنجو موقف ڏئي ڇڏيو آهي، هاڻي ايوان جي راءِ ورتي وڃي، جيڪڏهن بيوروڪريٽس کي دهري شهريت جي اجازت ڏني پئي وڃي ته پوءِ پارليامينٽ جي ميمبرن کي به ڏني وڃي۔
جڏهن نور عالم خان سرڪاري آفيسرن جي دهري شهريت بابت قانون تي ووٽنگ ڪرائي ته 7 مان 6 ميمبرن هٿ کڻي قانون جي حمايت ڪئي۔ ڪميٽي جي چيئرمين ملڪ ابرار اعلان ڪيو ته هو وزيراعظم سان صلاح مشوري کان پوءِ 16 فيبروري تي فيصلي جو اعلان ڪندا۔
سيڪريٽري ڪابينا ڪامران علي افضل چيو ته جيڪڏهن اهو توهان جو فيصلو آهي ته پوءِ ان ۾ ججن کي به شامل ڪيو وڃي۔
نور عالم خان چيو ته سپريم ڪورٽ جي هڪ جج دهري شهريت جي بنياد تي استعيفيٰ ڏنو هو۔ ڪميٽي چيئرمين ملڪ ابرار چيو ته بيوروڪريسي ۽ عدليه ۾ به دهري شهريت رکندڙ ماڻهو نه هجڻ گهرجن۔
