سکر آرٽس ڪونسل جي اليڪشن 27-2026ع جي چونڊجي آيل عھديدارن جي حلف برداري تقريب

سکر (ھئنڊآؤٽ) سکر آرٽس ڪونسل جي اليڪشن 27-2026ع ۾ چونڊجي آيل عھديدارن ۽ گورننگ باڊي ميمبرن جي حلف برداري تقريب ٿي گذري، انھيءَ موقعي تي سکر ڊويزن جي ڪمشنر عابد سليم قريشي تقريب جي خاص مھمان طور شرڪت ڪئي ۽ عھديدارن کان حلف کڻايو. ڪمشنر سکر عابد سليم قريشي نئين چونڊجي آيل باڊي کي مبارڪباد ڏني ۽ اميد جو اظھار ڪندي چيو تہ اھي پنھنجون منصبي ذميواريون خوش اصلوبي سان نڀائيندا، ھن آرٽس ڪائونسل جي سينگار علي سليم آڊيٽوريم ھال ۾ پنھنجي خطاب ۾ خواھش جو اظھار ڪندي اھو پڻ چيو تہ چونڊيل عھديدار سکر ۾ فن ۽ آرٽ جي ترويج لاءِ گڏجي ڪري ڪم ڪندا ۽ آرٽس ڪونسل جي باقي رھندڙ تعميري ڪم کي پڻ مڪمل ڪرائڻ ۾ پڻ بھتر ڪردار ادا ڪندا، ھن وڌيڪ چيو تہ سمورن ميمبرن کي کپي تہ ھو جمھوري عمل ذريعي چونڊجي آيل باڊي جا ھٿ مضبوط ڪن. تقريب کي ايڊيشنل ڪمشنر سکر ڊاڪٽر محمد عامر انصاري ۽ صدر سکر آرٽس ڪونسل ممتاز بخاري پڻ خطاب ڪيو.#