پاڪستان سنڌ طاس معاهدي جي معطلي ۽ آبي حقن جي ڀڃڪڙي کي جنگي قدم سمجهندو: وزيراعظم

اسلام آباد (ويب ڊيسڪ) وزيراعظم شهباز شريف چيو آهي ته پاڪستان کي ڀارت طرفان سنڌ طاس معاهدي کي معطل ڪرڻ واري فيصلي تي سخت خدشا آهن، جڏهن ته پاڪستان جي پاڻيءَ جي حقن جي ڀڃڪڙي کي جنگي قدم سمجهيو ويندو.
پرڏيهي خابرو جي رپورٽ موجب، وزيراعظم شهباز شريف اسلام آباد ۾ مالديپ جي صدر محمد معيزو سان ملاقات ڪئي، جنهن دوران ٻنهي ملڪن جي وفدن وچ ۾ ڳالهيون به ٿيون.
گڏيل ڳالهين کانپوءِ پريس ڪانفرنس ڪندي شهباز شريف چيو ته پاڪستان جو موقف واضح آهي ته معاهدن جو احترام ٿيڻ گهرجي ۽ گڏيل آبي وسيلن کي سياسي دٻاءُ وجهڻ يا بليڪ ميلنگ لاءِ استعمال نه ڪرڻ گهرجي.
وزيراعظم چيو ته پاڪستان مختلف عالمي فورمن تي اهو موقف پيش ڪري چڪو آهي، تازو گڏيل قومن جي جنرل اسيمبليءَ کي خطاب ڪندي به هن پاڻيءَ کي پاڪستان لاءِ ريڊ لائين قرار ڏنو هو.
هن چيو ته پاڻي خوشحالي ۽ ترقيءَ جو ذريعو آهي، ان کي ڌمڪين يا تڪرارن لاءِ استعمال نه ڪرڻ گهرجي.
سندس چوڻ هو ته پاڻي انسانيت لاءِ نهايت ضروري آهي، خاص طور انهن ملڪن لاءِ جيڪي دريائن جي هيٺئين وهڪري وارن علائقن ۾ آهن.
ياد رهي ته ڀارت گذريل سال اپريل ۾ پهلگام حملي کانپوءِ سنڌ طاس معاهدي کي معطل ڪرڻ جو اعلان ڪيو هو.