مورخہ 29 مارچ دير رات لطيف آباد بي سيڪشن جي حدن يونٽ نمبر 5 ۾ هڪ افسوسناڪ واقعو پيش آيو، جتي هوٽل ۾ ڪم ڪندڙ مزدور ثناءُالله ولد چنيسر منگريو جي بي رحماڻي ڳلي ڪٽيل لاش برآمد ٿي۔
ايس ايس پي حيدرآباد جناب شاهزيب چاچڙ واقعي جو فوري نوٽيس وٺندي ايس ايڇ او بي سيڪشن کي فوري ڪيس داخل ڪري جوابدارن جي گرفتاري جا حڪم جاري ڪيا۔
ايس ايڇ او بي سيڪشن انسپيڪٽر نياز احمد پنهوڙ مقتول جي ڀاءُ مصري منگريو جي فرياد تي ڪيس نمبر 82/2026 قلم 302، 34 تعزيراتِ پاڪستان تحت داخل ڪري جاچ شروع ڪئي۔
اڄ بي سيڪشن پوليس ڳجهي اطلاع تي ڪارروائي ڪندي جيئن ئي نائيجاني بند يونٽ نمبر 10 لطيف آباد ۾ جوابدارن جي موجودگي تي ڇاپو هنيو ته ٻن جوابدارن پوليس پارٽي تي فائرنگ شروع ڪري ڏني۔ پوليس جي جوابي ڪارروائي ۾ هڪ جوابدار ريحان ولد مير حسن گوپانگ، رهواسي ڳوٺ نور محمد خان گوپانگ، تعلقه بلڙي شاهه ڪريم، ضلع ٽنڊو محمد خان کي زخمي حالت ۾ پستول سميت گرفتار ڪيو ويو۔
جڏهن ته لرزه خيز قتل ۾ ملوث سندس ساٿي جوابدار سعود احمد گوپانگ موقع تان فرار ٿيڻ ۾ ڪامياب ٿي ويو، جنهن جي گرفتاري لاءِ پوليس ٽيمون روانيون ڪيون ويون آهن۔
زخمي جوابدار کي فوري علاج لاءِ سول اسپتال منتقل ڪيو ويو آهي۔
زخمي جوابدار اسپتال ويندي ابتدائي بيان ۾ قتل جو اعتراف ڪندي واردات جا تفصيل پڻ ٻڌايا آهن۔
وڌيڪ قانوني ڪارروائي جاري آهي۔
ترجمان ضلعي پوليس حيدرآباد
