شاگرد پاران امتحاني مرڪز اندر ٽڪ ٽاڪ وڊيو ٺاهڻ جو واقعو سامهون اچڻ کان پوءِ بورڊ آف سکر حرڪت ۾ اچي ويو

سکر ڊسٽرڪٽ رپورٽر: سکر ۾ جاري امتحانن دوران هڪ شاگرد پاران امتحاني مرڪز اندر ٽڪ ٽاڪ وڊيو ٺاهڻ جو واقعو سامهون اچڻ کان پوءِ بورڊ آف انٽرميڊيئيٽ اينڊ سيڪنڊري ايجوڪيشن سکر حرڪت ۾ اچي ويو آهي. ذريعن موجب هي واقعو ميونسپل هاءِ اسڪول سکر جي امتحاني مرڪز ۾ پيش آيو، جتي هڪ شاگرد امتحان دوران موبائل فون استعمال ڪندي وڊيو ٺاهي. واقعي جو نوٽيس وٺندي اي سي اي غلام مصطفيٰ پيرزادو فوري جاچ جو حڪم ڏئي ڇڏيو ۽ امتحاني نظام ۾ شفافيت کي يقيني بڻائڻ لاءِ سخت هدايتون جاري ڪيون. هن واضح ڪيو ته امتحاني مرڪزن ۾ موبائل فون آڻڻ ۽ استعمال ڪرڻ تي سخت پابندي آهي ۽ ان جي ڀڃڪڙي ڪنهن به صورت ۾ برداشت نه ڪئي ويندي. غلام مصطفيٰ پيرزادو سڀني سپرنٽنڊنٽس ۽ نگراني عملي کي هدايت ڪئي ته امتحاني مرڪزن ۾ داخلا وقت شاگردن جي مڪمل تلاشي ورتي وڃي ۽ موبائل فون تي مڪمل پابندي کي يقيني بڻايو وڃي. هن چيو ته ڪنهن به مشڪوڪ سرگرمي تي فوري ڪارروائي ڪئي وڃي ۽ لاپرواهي ڪندڙ عملي خلاف به سخت قدم کنيا ويندا. هن پنهنجي عزم جو اظهار ڪندي چيو ته بورڊ محنتي ۽ ايماندار شاگردن جي حقن جي تحفظ لاءِ هر ممڪن قدم کڻي رهيو آهي. سندس چوڻ موجب جديد نگراني نظام، اوچتن دورن ۽ عملي جي بهتر تربيت ذريعي امتحانن ۾ شفافيت کي هر صورت يقيني بڻايو ويندو ۽ ميرٽ تي ڪنهن به قسم جو سمجهوتو نه ڪيو ويندو.