چين جي صوبي زيجيانگ ۾ هڪ حيرت انگيز واقعو سامهون آيو آهي، جتي هڪ ماءُ پنهنجي 9 کان 10 سالن جي پٽ کي پوليس اسٽيشن وٺي وئي، ڇو ته هو اسڪول جو ڪم تمام سست رفتاري سان مڪمل ڪندو هو.
چيني ميڊيا موجب ٻار جي ماءُ، جنهن جو نالو شياؤنگ ٻڌايو پيو وڃي، پوليس اهلڪارن کي ٻڌايو ته سندس پٽ هميشه گهر جو ڪم دير سان ۽ سستي سان ڪندو آهي، جنهن سبب هو پريشان هئي.
ان مسئلي کي حل ڪرڻ لاءِ ماءُ هڪ انوکو قدم کنيو ۽ پٽ سان شرط رکي ته جيڪڏهن هن شام 6 وڳي تائين اسڪول جو ڪم مڪمل نه ڪيو ته کيس پوليس اسٽيشن وٺي ويندي.
ٻار اها شرط قبول ڪري ورتي، پر جڏهن ماءُ شام 5 وڳي گهر پهتي ته هن ڏٺو ته ٻار ٽي وي ڏسي رهيو هو ۽ نوڊلز کائي رهيو هو، جڏهن ته ڪم تقريباً نامڪمل هو.
شام 6 وڳي تائين به صورتحال گهڻي تبديل نه ٿي ۽ صرف ٿورا لفظ لکيل هئا. ان کان پوءِ ماءُ ٻار کي ويجهي پوليس اسٽيشن وٺي وئي.
اتي پوليس اهلڪارن کي صورتحال ٻڌائي وئي، جن مسڪرائيندي ٻار کي پوليس اسٽيشن ۾ ئي پنهنجو اسڪول جو ڪم مڪمل ڪرڻ جي اجازت ڏني.
حيرت جي ڳالهه اها هئي ته ٻار، جيڪو گهر ۾ ڪلاڪن تائين ڪم ڪندو هو، پوليس اسٽيشن ۾ هڪ ڪلاڪ اندر مڪمل ڪم ڪري ورتو.
ماءُ موجب پوليس اهلڪارن انتهائي سٺي نموني صورتحال کي سنڀاليو ۽ ٻار به شرمندگي محسوس ڪندي خاموش رهيو.
هن واقعي کان پوءِ ماءُ جو چوڻ آهي ته هاڻي سندس پٽ گهر ۾ اسڪول جو ڪم وڌيڪ تيزي سان مڪمل ڪري ٿو۔
