پاڪستان گڏيل عرب امارات (يو اي اي) کي 2 ارب ڊالر جي رقم واپس ڪري ڇڏي آهي. اسٽيٽ بئنڪ آف پاڪستان جي ترجمان موجب هي رقم “سييف ڊپازٽ” جي صورت ۾ پاڪستان جي اڪائونٽ ۾ موجود هئي.
ذريعن مطابق تازين عالمي حالتن سبب گڏيل عرب امارات هن رقم جي فوري واپسي جو مطالبو ڪيو، جنهن کان پوءِ پاڪستان قرض واپس ڪرڻ جو فيصلو ڪيو.
وزارت خزانه جي ذريعن موجب پاڪستان هن رقم تي لڳ ڀڳ 6 سيڪڙو سالياني سود ادا ڪري رهيو هو. ان کان اڳ يو اي اي اها رقم سالياني بنيادن تي رول اوور ڪندو رهيو، پر ڊسمبر 2025 ۾ ان کي پهريان هڪ مهيني ۽ پوءِ ٻن مهينن لاءِ عارضي طور رول اوور ڪيو ويو هو.
معاشي ماهرن موجب هي ادائيگي پاڪستان جي پرڏيهي مالي معاملن ۽ دوست ملڪن سان مالي تعاون جي حوالي سان هڪ اهم قدم آهي.
ٻئي طرف تازو ڏينهن ۾ پاڪستان کي سعودي عرب کان به 2 ارب ڊالر مليا آهن، جڏهن ته سعودي عرب پاڪستان کي وڌيڪ 3 ارب ڊالر جمع ڪرائڻ جي به خاطري ڏني آهي، جيڪو ملڪ جي زرمبادله ذخيرن لاءِ اهم پيش رفت قرار ڏنو پيو وڃي۔
