چيني سائنسدانن هڪ نئون طريقو تيار ڪيو آهي، جنهن ذريعي سج جي توانائي کي رات جي وقت به استعمال ڪري بجلي پيدا ڪري سگهجي ٿي. هي تحقيق جرنل “Advanced Energy Materials” ۾ شايع ٿي آهي.
سولر پينلز جو وڏو مسئلو اهو آهي ته اهي صرف ڏينهن ۾ ڪم ڪن ٿا، جڏهن سج جي روشني موجود هجي. رات جو اهي بجلي پيدا نٿا ڪري سگهن، جنهن سبب توانائي جي کوٽ پيدا ٿئي ٿي. هن مسئلي کي حل ڪرڻ لاءِ سائنسدانن هڪ نئون حل پيش ڪيو آهي.
محققن بالسا ووڊ نالي هلڪي ڪاٺ کي استعمال ڪيو، جنهن جي اندروني بناوت کي تبديل ڪري ان کي اسفنج جهڙو بڻايو ويو ته جيئن اها سج جي روشني جذب ڪري حرارت ذخيرو ڪري سگهي.
پهريان ڪاٺ مان هڪ خاص ماليڪيول ڪڍيو ويو جيڪو روشني کي رد ڪندو هو. پوءِ ان جي سطح تي سياه فاسفورس جا انتهائي سنها پرت لڳايا ويا ته جيئن روشني جذب ڪرڻ بهتر ٿي سگهي.
ان کان علاوه نانو ذرات ۽ هائيڊرو ڪاربن مرڪبات به شامل ڪيا ويا، جڏهن ته آخر ۾ اسٽيرڪ ايسڊ شامل ڪيو ويو جيڪو گرمي کي ذخيرو ڪري ۽ پوءِ آهستي آهستي خارج ڪري سگهي.
ٽيسٽ دوران هي خاص ڪاٺ 91.2 سيڪڙو سج جي روشني کي حرارت ۾ تبديل ڪرڻ ۾ ڪامياب ٿي وئي ۽ ان مان بجلي به پيدا ڪئي وئي.
محققن موجب هي طريقو ڊگهي عرصي تائين مستحڪم رهي ٿو ۽ وقت سان ڪارڪردگي ۾ وڏي گهٽتائي نٿي اچي.
هاڻي به هي تحقيق ابتدائي مرحلي ۾ آهي، پر جيڪڏهن وڌيڪ ترقي ٿي ته مستقبل ۾ رات جي وقت به سج جي توانائي مان بجلي حاصل ڪرڻ ممڪن ٿي سگهي ٿو، جنهن سان بيٽرين تي انحصار گهٽجي ويندو ۽ صاف توانائي جو نظام وڌيڪ بهتر ٿي ويندو۔
