اسلام آباد: ملڪ جي مختلف شهرن ۾ اٽي جي قيمتن ۾ اوچتو اضافو ڏٺو ويو آهي، جتي رڳو هڪ هفتي دوران 20 ڪلو اٽي جو ٿيلهو 200 رپين تائين مهانگو ٿي ويو آهي، جنهن سان عام ماڻهن جي پريشاني وڌي وئي آهي۔
وفاقي اداري شماريات جي تازي رپورٽ موجب حيدرآباد ۽ لاڙڪاڻو ۾ 20 ڪلو اٽي جو ٿيلهو 200 رپين تائين مهانگو ٿيو، جڏهن ته سرگودھا ۾ 190 رپيا ۽ سکر ۾ 160 رپين تائين واڌ رڪارڊ ڪئي وئي آهي۔
ان کان علاوه ملتان ۾ اٽي جي قيمت ۾ 133 رپيا 33 پيسا واڌ ٿي، جڏهن ته ڪراچي ۽ خضدار ۾ 100 رپين تائين اضافو ڏٺو ويو آهي۔ رپورٽ موجب ڪوئيٽا ۾ 90 رپيا، اسلام آباد ۾ 67، گوجرانوالا ۾ 66 ۽ راولپنڊي ۾ 40 رپين تائين واڌ ٿي آهي۔
شماريات موجب ڪراچي هن وقت ملڪ جو سڀ کان مهانگو شهر بڻجي ويو آهي جتي 20 ڪلو اٽي جو ٿيلهو 2500 رپين تائين پهچي ويو آهي، جڏهن ته لاهور ۾ اهو ئي ٿيلهو سڀ کان گهٽ قيمت يعني تقريباً 1810 رپين ۾ موجود آهي۔
ٻين شهرن ۾ ڪوئيٽا ۾ اٽو 2450 رپيا، حيدرآباد ۾ 2440، اسلام آباد ۾ 2373، پشاور ۾ 2350، جڏهن ته بنو ۽ خضدار ۾ 2300 رپين تائين وڪرو ٿي رهيو آهي۔
ساڳئي ريت راولپنڊي ۾ 2347، فيصل آباد ۾ 2250، جڏهن ته سکر ۽ لاڙڪاڻو ۾ 2200 رپين تائين اٽو موجود آهي۔ گوجرانوالا، ملتان ۽ سيالڪوٽ ۾ 2133 رپيا، بهاولپور ۾ 2067 ۽ سرگودھا ۾ لڳ ڀڳ 2000 رپين تائين 20 ڪلو اٽي جو ٿيلهو ملي رهيو آهي۔
ماهرن جو چوڻ آهي ته اٽي جي قيمتن ۾ واڌ جو سڌو اثر عام ماڻهو تي پوي ٿو، خاص طور تي گهٽ آمدني وارن طبقن لاءِ بنيادي خوراڪ مهانگي ٿيڻ وڏي مسئلي جي صورت اختيار ڪري سگهي ٿي۔
شهرين حڪومت کان مطالبو ڪيو آهي ته اٽي جي اگهن کي ڪنٽرول ڪرڻ لاءِ فوري قدم کنيا وڃن، جيئن مهانگائي تي ضابطو آڻي سگهجي ۽ ماڻهن کي رليف ملي سگهي۔
