ڊپٽي ڪمشنر بدين جو اڪرم واهه، وھڻائي شريف ويجهو زيرِ تعمير پل جو دورو، تعميراتي ڪم معياري بڻائڻ ۽ جلد مڪمل ڪرڻ جون هدايتون

بدين ڊپٽي ڪمشنر بدين زارا زاهد اڪرم واهه، وھڻائي شريف ويجهو زيرِ تعمير پل جو دورو ڪري تعميراتي ڪم جي اڳڀرائي، معيار ۽ متبادل رستي جو جائزو ورتو هن لاڳاپيل عملدارن کي هدايت ڪئي ته تعميراتي ڪم جي معيار تي ڪنهن به قسم جو سمجهوتو نه ڪيو وڃي ۽ عوام کي پيش ايندڙ سفري مشڪلاتن کي نظر ۾ رکندي پل جي تعمير ترجيحي بنيادن تي مڪمل ڪئي وڃي ان موقعي تي اسسٽنٽ ڪمشنر بدين راجيش دلپت ۽ ايگزيڪيوٽو انجنيئر پراونشل هاءِ وي ڊويزن بدين سليم ميمڻ پڻ ساڻس گڏ هئا ايگزيڪيوٽو انجنيئر سليم ميمڻ ڊپٽي ڪمشنر کي جاري ترقياتي اسڪيم ۽ تعميراتي ڪم جي موجوده صورتحال بابت تفصيلي بريفنگ ڏني ڊپٽي ڪمشنر زارا زاهد واضح ڪيو ته ترقياتي منصوبن جي وقت سر تڪميل ۽ تعميراتي معيار کي يقيني بڻائڻ لاڳاپيل کاتن جي بنيادي ذميواري آهي هن هدايت ڪئي ته تعميراتي ڪم دوران ڪنهن به قسم جي غفلت يا ڪوتاهي برداشت نه ڪئي ويندي ۽ منصوبي کي جلد مڪمل ڪرڻ لاءِ سمورا دستياب وسيلا ڪتب آندا وڃن هن چيو ته پل جي تعمير ۾ دير سبب شهرين ۽ ٻين مسافرن کي اچ وڃ ۾ ڏکيائين کي منهن ڏيڻو پئجي رهيو آهي تنهنڪري عوامي سهولت کي نظر ۾ رکندي تعميراتي ڪم جي رفتار تيز ڪئي وڃي جيئن ماڻهن کي پيش ايندڙ مشڪلاتن جو جلد از جلد خاتمو آڻي سگهجي ڊپٽي ڪمشنر لاڳاپيل عملدارن کي وڌيڪ هدايت ڪئي ته زيرِ تعمير پل جي ويجهو مناسب هنڌن تي معلوماتي ۽ رهنمائي وارا بورڊ لڳايا وڃن جيئن مسافرن ۽ ٽريفڪ کي تعميراتي ڪم ۽ اچ وڃ جي انتظامن بابت بروقت آگاهي ملي سگهي بعد ۾ ڊپٽي ڪمشنر پل جي متبادل رستي جو پڻ معائنو ڪيو ۽ هدايت ڪئي ته پل جي تعمير مڪمل ٿيڻ تائين متبادل رستي کي هموار، محفوظ ۽ آمدورفت لاءِ موزون بڻايو وڃي، جيئن شهرين کي روزاني سفر دوران گهٽ ۾ گهٽ ڏکيائين کي منهن ڏيڻو پوي