تاريخي امروٽي مسجد خلاف نوٽيس نامنظور، نوٽيس واپس ورتو وڃي – مطالبو

سکر (عبدالجبارنوناري) تاريخي امروٽي مسجد کي ٻن ڏينهن اندر خالي ڪرائڻ ۽ تعميرات ختم ڪرڻ واري نوٽيس جي سخت لفظن ۾ مذمت ڪندي ان کي نامنظور ڪيو ويو آهي.انگريز سامراج جي دور ۾ به ديني سڃاڻپ ۽ اسلامي ورثي کي ميسارڻ جون ڪوششون ٿينديون رهيون، پر تاريخ شاهد آهي ته مسجدن جي حرمت ۽ دين سان وابستگي کي دٻائي نه سگهيا. اڄ جيڪڏهن تاريخي امروٽي مسجد کي ٻن ڏينهن اندر خالي ڪرائڻ جو نوٽيس جاري ڪيو ويو آهي ته اهو انتهائي سنجيده معاملو آهي، جنهن تي خاموشي اختيار نٿي ڪري سگهجي.مسجدن جي حرمت اسان جي ايمان جو حصو آهي، تاريخي مسجدن جي تحفظ ۽ احترام کي يقيني بڻائڻ بدران اهڙا قدم کڻڻ جيڪي ديني ۽ تاريخي ورثي لاءِ خطرو بڻجن، ڪنهن به صورت ۾ قبول نه ڪيا ويندا.اسان لاڳاپيل اختيارين کي چئون ٿا ته نوٽيس تي عملدرآمد کان اڳ معاملي جي تاريخي ۽ قانوني حيثيت جو منصفاڻو جائزو وٺن ۽ امروٽي مسجد جي تحفظ کي يقيني بڻائين.اسان جو مطالبو واضح آهي ته امروٽي مسجد کي تحفظ ڏيو، نوٽيس تي نظرثاني ڪريو ۽ ڪنهن به اهڙي قدم کان پاسو ڪريو جيڪو ديني جذبات کي مجروح ڪري.جيڪڏهن هن معاملي ۾ مسجد جي حرمت، تاريخي حيثيت ۽ قانوني حقن کي نظرانداز ڪيو ويو ته ان خلاف ڀرپور، سخت ۽ پرامن آئيني احتجاج ڪيو ويندو. ديني ورثي جي حفاظت لاءِ اسان هر جائز ۽ قانوني فورم تي آواز بلند ڪنداسين. مسجدن جو تحفظ اسان جو ديني فرض آهي، ان معاملي تي خاموشي اسان جي روايت ناهي.