ڪراچي: ڪراچي ۾ سنڌ رينجرز جي ڪيمپ تي حملي ۾ گرفتار ٿيل زخمي دهشتگرد، جيڪو اختيارين موجب جماعت الاحرار سان لاڳاپيل آهي، جاچ دوران دعويٰ ڪئي آهي ته هو افغانستان جي علائقي جلال آباد کان پاڪستان آيو هو ۽ اتي ئي تربيت حاصل ڪئي هئي.
سرڪاري طور جاري ڪيل وڊيو بيان موجب، گرفتار دهشتگرد پنهنجو نالو عثمان علي ٻڌايو ۽ چيو ته ساڻس گڏ ٽي ٻيا ساٿي پڻ هئا، جن جا نالا عبدالهادي، جانان ۽ عمر فاروق هئا.
هن دعويٰ ڪئي ته رينجرز جي ڪيمپ تي بم اڇلائڻ وارو سندس ساٿي جانان هو، جڏهن ته عبدالهادي باجوڙ سان تعلق رکندو هو ۽ حملي دوران مارجي ويو.
گرفتار جوابدار موجب، هو حملي کان لڳ ڀڳ ست ڏينهن اڳ پاڪستان پهتا هئا ۽ کين هڪ زير تعمير عمارت ۾ ترسايو ويو هو. هن اهو به دعويٰ ڪئي ته حملي ۾ استعمال ٿيل هٿيار عبدالهادي وزيرستان مان آندا هئا.
هن وڌيڪ چيو ته حملي کان پوءِ فرار ٿيڻ دوران کيس گولي لڳي، جنهن سبب هو زخمي ٿي ڪري پيو ۽ گرفتار ٿي ويو.
بيان ۾ عثمان علي دعويٰ ڪئي ته سندس تعلق جماعت الاحرار سان آهي ۽ افغانستان ۾ تنظيم جي هڪ ڪمانڊر جي نگراني هيٺ کيس ۽ سندس ساٿين کي تربيت ڏني وئي. هن اهو به دعويٰ ڪئي ته کين خودڪش جيڪٽن جي تياري ۽ ٻين عسڪري معاملن بابت تربيت افغانستان ۾ ڏني وئي ۽ ڪراچي اچڻ کان اڳ سمورا انتظام اتي ئي ڪيا ويا.
هن اهو پڻ چيو ته عبدالهادي اڳ ۾ به پاڪستان اچي چڪو هو ۽ گروپ جي ٻين ماڻهن کي هدايتون ڏيندو هو. سندس دعويٰ هئي ته شروعات ۾ کين فوج ۽ رينجرز جي وچ ۾ فرق جي ڄاڻ نه هئي، جيڪا پاڪستان پهچڻ کان پوءِ کين ٻڌائي وئي.
ٻئي طرف دفاعي ۽ سيڪيورٽي معاملن جي ڪجهه ماهرن جو چوڻ آهي ته جيڪڏهن جاچ دوران سامهون آيل اهي دعوائون صحيح ثابت ٿين ٿيون ته اهي سرحد پار دهشتگرد نيٽ ورڪن بابت پاڪستان جي خدشن جي عڪاسي ڪن ٿيون.
تزويراتي معاملن جي ماهرن موجب، پاڪستان ماضي ۾ به افغان اختيارين سان سرحد پار دهشتگردي بابت ثبوت شيئر ڪرڻ جي ڳالهه ڪندو رهيو آهي، جڏهن ته انهن معاملن بابت مختلف ڌرين جا موقف هڪ ٻئي کان مختلف رهيا آهن. انهن معاملن جي حتمي تصديق لاڳاپيل جاچ ۽ سرڪاري ادارن جي رپورٽن ذريعي ئي ٿي سگهي ٿي.
