ممبئي: بالي ووڊ اداڪار سيف علي خان چيو آهي ته هو پنهنجي پٽن تيمور علي خان ۽ جهانگير علي خان سان مذهب بابت کلي ڳالهائيندو آهي ۽ کين اهي ئي قدر سيکاريندو آهي، جيڪي کيس سندس ماءُ سيکاريا هئا.
ڀارتي ميڊيا موجب، لنڊن ۾ هڪ تقريب دوران ڳالهائيندي سيف علي خان چيو ته هو گهڻو مذهبي ناهي، پر سندس ماءُ کيس اهو سيکاريو ته خدا هڪ آهي، ۽ هن پنهنجي ٻارن کي به ساڳيو سبق ڏنو آهي.
سيف علي خان ٻڌايو ته هن اهڙن تعليمي ادارن ۾ تعليم حاصل ڪئي، جتي مختلف مذهبن جي تعليم، روايتن ۽ مذهبي ڏهاڙن جو احترام ڪيو ويندو هو. هن چيو ته هو اهڙي اسڪول ۾ پڙهندو هو، جتي هر ڏينهن جي شروعات چرچ ۾ عبادت سان ٿيندي هئي.
هن وڌيڪ چيو ته هڪ ڀيري هن اهو چئي ان عبادت کان بچڻ جي ڪوشش ڪئي ته سندس مذهب مختلف آهي، پر اسڪول انتظاميا سندس لاءِ هڪ مولوي صاحب جو انتظام ڪري ڇڏيو، جنهن سبب اهو بهانو به ڪم نه آيو.
سيف علي خان جو چوڻ هو ته سندس ٻار نماز به پڙهندا، ٻين مذهبن جي عبادتن ۾ به شرڪت ڪندا ۽ ديوالي سان گڏ ڪرسمس به ملهائيندا، ڇو ته هو چاهي ٿو ته هو مختلف مذهبن ۽ ثقافتن جو احترام ڪرڻ سکن.
ياد رهي ته سيف علي خان پنهنجي زندگي ۾ ٻن مختلف مذهبن سان تعلق رکندڙ اداڪارائن سان شاديون ڪيون. سندس ڪرينا ڪپور سان شادي 2012ع ۾ ٿي، جن مان کيس ٻه پٽ تيمور علي خان ۽ جهانگير علي خان آهن. هن وقت سيف علي خان جي عمر 53 سال جڏهن ته ڪرينا ڪپور 44 سال جي آهي.
ان کان اڳ سيف علي خان 1991ع ۾ اداڪارا امريتا سنگهه سان شادي ڪئي هئي، جيڪا عمر ۾ کانئس 13 سال وڏي هئي. هنن کي ٻه ٻار، سارا علي خان ۽ ابراهيم علي خان آهن، جڏهن ته 2004ع ۾ ٻنهي جي طلاق ٿي وئي.
