ڪوئٽه: (جمع: 27 مارچ 2026ع) ضلعي پشين جي ڏوراهين علائقي يارو ۾ رشتي جي تڪرار تان هٿياربندن جو گهر تي حملو ڪري فائرنگ شروع ڪري ڏني جنهن جي نتيجي ۾ هڪ عورت سميت 3 ڄڻا مارجي ويا جڏهن ته گهر جي هڪ ٻئي عورت به سخت زخمي ٿي پئي.
تفصيل موجب جوابدارن رشتي جي تڪرار تان محمد نسيم، انهي جي ڌيءَ مسمات(س) ۽ انهي جي ڀائٽئي شهريار کي نشانو بنايو، هٿياربندن گهر ۾ داخل ٿي فائرنگ شروع ڪري ڏني جنهن جي نتيجي ۾ محمد نسيم ۽ ان جو ڀائٽيو شهريار ٿڏي تي مارجي ويو. جڏهن ته ڌيءَ مسمات(س) به زخمن جا سور نه سهندي فوت ٿي وئي، فائرنگ سبب نسيم جي گهر واري مسمات(م) سخت زخمي ٿي پئي جنهن کي فوري طور تي ڊسٽرڪٽ ٽيچنگ اسپتال پشين منتقل ڪيو ويو جوابدار حملي جي فورن بعد فرار ٿي وڃڻ ۾ ڪامياب ٿي ويا.
واقعي جي اطلاع ملندي ئي يارو ٿاڻي جي ايس ايڇ او ۽ پوليس جي ٽيم واقعي واري هنڌ پهچي مقتولن جا لاش ۽ زخمي عورت کي اسپتال پهچايو جتي ڊاڪٽرن ٽن ڄڻن جي مارجي وڃڻ جي تصديق ڪئي. پشين پوليس واقعي جي جاچ شروع ڪري ڇڏي آهي جڏهن ته جوابدارن جي گرفتاري لاءِ ڇاپا هنيا پيا وڃن.
مقتولن جي وارثن قومي شاهراهه تي لاش رکي ڌرڻو هنيو احتجاج ڪندڙن پوليس تي سنگين الزام لڳائيندي چيو ته اسان اڳواٽ ئي پوليس کي اطلاع ڏني هئي پر پوليس ڪابه ڪارروائي نه ڪئي. وارثن جو چوڻ هو ته جيستائين قاتل گرفتار نه ٿيندا احتجاج جاري رهندو ۽ روڊ کي بلاڪ رکيو ويندو.
