ايم اين اي، ايم پي اي صاحبان جا دعوا صرف دعوا رھجي ويا ، ڪوٽڏيجي تعلقي جي مختلف علائقن ۾ سيم ۽ ڪلر جي ڪري پاڻي کارو ۽ زهريلو گندو پاڻي پيئڻ سبب مختلف بيمارين ۾ اضافو، ڪيترائي ماڻهو فوت، واٽر سپلاءِ ۽ فلٽريشن پلانٽ به غيرفعال ،
ڪوٽڏيجي تعلقي جي چونڊيل نمائندن پاران ترقي ۽ عوامي خدمت جا دعوائون ته مسلسل ڪيا وڃن ٿا، پر لکين آبادي وارو ڪوٽڏيجي تعلقو اڄ به پيئڻ جي صاف پاڻي جهڙي بنيادي سهولت کان محروم بڻيل آهي. 2023ع جي آدمشماري موجب ڪوٽڏيجي تعلقي جي مجموعي آبادي 3 لک 85 هزار 872 ماڻهن تي مشتمل آهي، جنهن مان 2 لک 91 هزار 472 ٻهراڙي ۽ 94 هزار 400 شهري آبادي شامل آهي.
ڪوٽڏيجي تعلقي جي مختلف يونين ڪائونسلن ۽ ٽنهي شهري مرڪزن ڪوٽڏيجي، ڪنب ۽ فقيرآباد ۾ پيئڻ جي پاڻي جو مسئلو سنگين صورتحال اختيار ڪري چڪو آهي. سم ۽ ڪلر جي ڪري جر کارا ٿي ويا ۽ لوڻياٺ جي وڌندڙ مقدار سبب ڪيترن ئي علائقن ۾ پاڻي کارو، ڪڙو ۽ انساني واپرائڻ لاءِ انتهائي نقصانڪار بڻجي ويو آهي، جنهن سبب شهرين کي سخت مشڪلاتن کي منهن ڏيڻو پئجي رهيو آهي.
علائقي واسين جو چوڻ آهي ته صاف ۽ مٺو پاڻي دستياب نه هجڻ سبب ماڻهو مجبوريءَ تحت کارو پاڻي پيئڻ ۽ استعمال ڪرڻ تي مجبور آهن، جنهن ڪري پيٽ ۽ معدي جي مختلف بيمارين سان گڏ هيپاٽائٽس سميت ٻين بيمارين جا ڪيس پڻ وڌي رهيا آهن. شهرين موجب پاڻي ۽ ٻين بيمارين سبب تعلقي ۾ ڪيترائي ماڻهو فوت ٿي چڪا آهن، جڏهن ته وڏي انگ ۾ ماڻهو مختلف بيمارين ۾ مبتلا آهن.
تعلقي ۾ صاف ۽ مٺو پاڻي فراهم ڪرڻ لاءِ قائم ڪيل مختلف واٽر سپلاءِ، فلٽريشن ۽ ٻين منصوبن جي ڪارڪردگي پڻ سواليہ نشان بڻيل آھي . شهرين جو چوڻ آهي ته جتي فلٽريشن يا صاف پاڻي جا پلانٽ قائم ڪيا ويا، انهن مان ڪيترائي ڊگهي عرصي کان بند يا خراب پيل آهن، جڏهن ته ڪيترن ئي علائقن ۾ اڄ تائين مستقل بنيادن تي صاف پاڻي جي سهولت فراهم نه ٿي سگهي آهي.
پاڻي جو بحران صرف انساني صحت تائين محدود نه رهيو آهي، پر زرعي شعبو پڻ ان جي اثرن کان متاثر ٿي رهيو آهي. آبادگارن موجب سيم ۽ ڪلر جي ڪري زميني پاڻي جي خراب صورتحال سبب زرعي زمينن جي زرخيزي متاثر ٿي رهي آهي، جڏهن ته ڪيترن ئي هنڌن تي زمينون آهستي آهستي بنجر ٿيڻ طرف وڌي رهيون آهن، جنهن سان هزارين آبادگار خاندانن جو روزگار خطري ۾ پئجي ويو آهي.
شهرين چونڊيل نمائندن ايم اين اي ۽ ايم پي اي کان سوال ڪيو آهي ته چونڊن دوران عوام سان ڪيل ترقياتي واعدا آخر ڪيڏانهن ويا؟ جيڪڏهن لکين آبادي واري تعلقي ۾ عوام کي پيئڻ لاءِ صاف پاڻي به ميسر نه هجي ته عوامي خدمت ۽ ترقي جا دعوائون ڪهڙي بنياد تي ڪيون پيون وڃن؟
علائقي واسين جو چوڻ آهي ته چونڊيل نمائندن جون سرگرميون عوامي مسئلن جي عملي حل بدران اڪثر تعزيتن ۽ رسمي سياسي سرگرمين تائين محدود نظر اچن ٿيون، جڏهن ته بنيادي مسئلا اڃا تائين جيئن جو تيئن موجود آهن.
شهرين سنڌ جي وڏي وزير، پبلڪ هيلٿ، آبپاشي ۽ صحت کاتي جي اعليٰ اختيارين کان مطالبو ڪيو آهي ته ڪوٽڏيجي تعلقي جي سمورن علائقن مان پيئڻ جي پاڻي جا نمونا وٺي سائنسي بنيادن تي ٽيسٽ ڪرايا وڃن، بند واٽر سپلاءِ ۽ فلٽريشن پلانٽ فوري طور بحال ڪيا وڃن، سيم ۽ ڪلر کان متاثر علائقن لاءِ مستقل بنيادن تي منصوبابندي ڪئي وڃي ۽ عوام کي صاف ۽ محفوظ پاڻي جي فراهمي يقيني بڻائي وڃي.
عوام جو چوڻ آهي ته صاف پاڻي ڪو سياسي احسان نه پر بنيادي انساني حق آهي، چونڊيل نمائندن کي هاڻي دعوائن ۽ تعزيتن کان اڳتي وڌي عملي ڪم ڪرڻو پوندو.
