پورهيتن واري صوبائي وزير سعيد غني ڪراچي پريس ڪلب جي سالياني چونڊن 2026ع ۾ نئين چونڊجي آيل عهديدارن کي دل جي گهراين سان مبارڪباد پيش ڪئي آهي.

سعيد غني چيو آهي ته ڪراچي پريس ڪلب جي سالياني چونڊن ۾ ”دي ڊيموڪريٽس پينل“ کي گذريل ڪيترن ئي سالن جيان هن سال به ڪاميابي حاصل ڪرڻ تي هو دل سان مبارڪباد پيش ڪري ٿو. سعيد غني چيو ته گذريل ٻن ڏهاڪن کان ”دي ڊيموڪريٽس پينل“ جي ڪاميابين جو تسلسل جاري رهڻ صحافتي برادري جي اعتماد ۽ ڪراچي پريس ڪلب جي مضبوط جمهوري روايتن جو واضح ثبوت آهي. هن چيو ته اهڙي تسلسل سان ڪاميابي حاصل ڪرڻ پاڻ ۾ هڪ وڏو اعزاز آهي. صوبائي وزير ڪراچي پريس ڪلب جي چونڊن 2026ع ۾ فاضل جميلي جي صدر، ارشاد کوکر جي نائب صدر، محمد اسلم خان جنرل سيڪريٽري، محمد فاروق سميع جي جوائنٽ سيڪريٽري ۽ عمران ايوب جي خازن چونڊجڻ تي کين مبارڪباد ڏني. ان سان گڏ گورننگ باڊي جي ستن ئي عهديدارن عبدالجبار ناصر، اختر حسين سومرو، شيما صديقي، فريال عارف، جاويد صبا، سيد فريد عالم ۽ جاويد مهر جي چونڊجڻ تي به کين دل جي گهراين سان مبارڪباد پيش ڪئي. سعيد غني چيو ته ڪراچي پريس ڪلب تاريخي اهميت جو حامل ادارو آهي، جتان ڪيترين ئي صحافتي تحريڪن جنم ورتو ۽ انهي ئي پليٽ فارم تان صحافين پنهنجن حقن جي حاصلات لاءِ تاريخ ساز جدوجهد ڪئي. هن اميد ظاهر ڪئي ته سمورا نومنتخب عهديدار ۽ ميمبر صحافين جي فلاح و بهبود، حقن جي تحفظ ۽ صحافتي قدرن جي پاسداري لاءِ پنهنجو ڀرپور ڪردار ادا ڪندا. صوبائي وزير سعيد غني وڌيڪ چيو ته پاڪستان پيپلز پارٽي ملڪ جي اها واحد سياسي جماعت آهي جيڪا آزاديِ صحافت جي علمبردار رهي آهي. هن چيو ته شهيد محترمه بينظير ڀٽو ڪراچي پريس ڪلب ۽ هتي جي صحافين کي پهريون ڀيرو رهائش لاءِ پلاٽ فراهم ڪيا، جنهن جو تسلسل صدر آصف علي زرداري ۽ چيئرمين بلاول ڀٽو زرداري اڄ تائين برقرار رکيو پيو اچي. سعيد غني چيو ته پاڪستان پيپلز پارٽي آزاد صحافت جي باني ۽ آزاديِ صحافت جي حقيقي علمبردار آهي ۽ هميشه صحافين سان گڏ بيٺي رهندي