سانگهڙ اسپتال ۾ هيموفيليا ۽ ٿيليسيميا بابت آگاهي سيمينار منعقد ٿيو.

سيمينار جو انعقاد سول سرجن ڊاڪٽر آفتاب اعظم سريوال ڪيو، جنهن ۾ پاڪستان پيپلز پارٽي جي سينيٽر قرة العين مري، ڊپٽي ڪمشنر سانگهڙ سارہ جاويد، ٻارن جي ماهر ڊاڪٽر صادق سيال، اورنگزيب مري، انيس الرحمان، پي پي پي تعلقي جي صدر اعجاز حسين زرداري، تعلقي جنرل سيڪريٽري عمر گل هنگورجو، ياسر مري، ڊاڪٽرن، پيرا ميڊيڪل اسٽاف ۽ طبي عملي شرڪت ڪئي. سيمينار دوران ڊاڪٽر نثار احمد شرڪت ڪندڙن کي ضلعي هيڊ ڪوارٽر اسپتال جي ڪارڪردگي ۽ مريضن کي فراهم ٿيندڙ طبي سهولتن بابت تفصيلي بريفنگ ڏني. ان موقعي تي ٻارن جي ماهر ڊاڪٽر صادق سيال ٿيليسيميا جي سببن، علامتن، بروقت تشخيص، رت جي منتقلي ۽ علاج جي مختلف پهلوئن تي تفصيلي روشني وڌي. هيموفيليا ويلفيئر سوسائٽي جي ڊاڪٽر راحيل شرڪت ڪندڙن کي هيموفيليا جي بيماري، ان جي علامتن، مريضن جي سنڀال، رت وهڻ جي صورت ۾ احتياط ۽ علاج بابت آگاهي ڏني. ماهرن چيو ته هيموفيليا ۽ ٿيليسيميا موروثي بيماريون آهن، جن کي بروقت تشخيص ۽ مناسب طبي خيال سان بهتر بڻائي سگهجي ٿو. مقررين چيو ته عوام ۾ شعور اجاگر ڪرڻ، بيماري جي بروقت تشخيص ۽ مناسب طبي صلاح مشوري انهن بيمارين جي پکيڙ کي گهٽائڻ لاءِ تمام ضروري آهن. خاص طور تي شادي کان اڳ اسڪريننگ ۽ خاندان ۾ موروثي بيمارين جي موجودگي جي صورت ۾ بچاءُ جا اپاءَ وٺڻ بيمارين کي روڪڻ ۾ اهم ڪردار ادا ڪري سگهن ٿا. سيمينار ۾ شرڪت ڪندڙن هيموفيليا ۽ ٿيليسيميا جي مريضن کي بهتر طبي سهولتون فراهم ڪرڻ، علاج بابت شعور وڌائڻ ۽ سماج ۾ موروثي بيمارين بابت شعور اجاگر ڪرڻ جي ضرورت تي زور ڏنو. تقريب جي آخر ۾ مقررين چيو ته مستقبل ۾ به اهڙا آگاهي پروگرام منعقد ڪرڻ گهرجن ته جيئن عوام کي بيمارين جي بروقت تشخيص، علاج ۽ بچاءُ جي قدمن بابت وڌ ۾ وڌ معلومات فراهم ڪري سگهجي.