سنڌ زرعي يونيورسٽي پاران جشنِ آزادي جي سلسلي ۾ مقامي مالوندن لاءِ مفت وٽرنري علاج ۽ ويڪسينيشن ڪيمپ

سنڌ زرعي يونيورسٽي ٽنڊوڄام ۾ جشنِ آزادي جي سلسلي ۾ فيڪلٽي آف اينيمل هسبنڊري اينڊ وٽرنري سائنسز جي وٽرنري ڪلينڪس ۾ مقامي مالوندن جي بيمار چوپائي مال جي مفت طبي چڪاس، علاج، الٽراسائونڊ ۽ لائيو اسٽاڪ ويڪسينيشن لاءِ ڪيمپ جاري آهي، سنڌ زرعي يونيورسٽي جي وائيس چانسلر انجنيئر پروفيسر ڊاڪٽر الطاف علي سيال جي هدايتن ۽ رهنمائيءَ ۾ منعقد ڪيل ڪيمپ جو اهتمام فيڪلٽي آف اينيمل هسبنڊري اينڊ وٽرنري سائنسز جي ڊين ڊاڪٽر سيد غياث الدين شاهه راشدي ۽ ماهر وٽرنري ڊاڪٽر احمد نواز ٽنيو جي نگرانيءَ ۾ ڪيو ويو، ڪيمپ جو بنيادي مقصد مقامي مالوندن جي بيمار مال جي بروقت چڪاس ۽ مفت علاج فراهم ڪرڻ سان گڏ مختلف بيمارين کان بچاءَ لاءِ جانورن جي ويڪسينيشن پڻ ڪرڻ هو، ڪيمپ دوران وڏي انگ ۾ ڀاڳيا پنهنجا بيمار ۽ صحتمند جانور معائني ۽ علاج لاءِ کڻي آيا، جتي يونيورسٽي جي ماهر وٽرنري ڊاڪٽر ڊاڪٽر احمد نواز تنئي ۽ لاڳاپيل عملي پاران جانورن جو طبي معائنو، بيمارين جي چڪاس، الٽراسائونڊ چڪاس، علاج ۽ ويڪسينيشن ڪئي وئي، جڏهن ته ضرورت موجب مفت دوائون پڻ فراهم ڪيون ويون، ان موقعي تي فيڪلٽي آف اينيمل هسبنڊري اينڊ وٽرنري سائنسز جي ڊين ڊاڪٽر سيد غياث الدين شاهه راشدي ۽ ٻين يونيورسٽي آفيسرن ڪيمپ جو دورو ڪري مختلف سرگرمين جو جائزو ورتو، جتي کين ماهر وٽرنري ڊاڪٽر احمد نواز ٽنيو کين ڪيمپ ۾ فراهم ٿيندڙ چڪاس ۽ طبي سهولتن بابت ڄاڻ ڏني، ڊاڪٽر سيد غياث الدين شاهه راشدي چيو ته سنڌ زرعي يونيورسٽي پاران اهڙن مفت وٽرنري ڪيمپ قائم ڪرڻ، نہ رڳو يونيورسٽي ۽ عوام وچ ۾ رابطن کي مضبوط ڪري ٿو، پر مقامي مالوندن کي بروقت طبي سهولتون فراهم ڪري سندن معاشي تحفظ ۾ پڻ اهم ڪردار ادا ڪري ٿو، مقامي مالوندن سنڌ زرعي يونيورسٽي جي ان قدم کي ساراهيندي مفت وٽرنري معائني، بيمارين جي تشخيص، علاج، الٽراسائونڊ، ويڪسينيشن ۽ دوائن جي سهولت فراهم ڪرڻ تي يونيورسٽي انتظاميا جا ٿورا مڃيا.