سکر (رپورٽ: ماجد محمود): روهڙي جي علائقي ڪنڊي فارم ۾ مبينا مالي ۽ انتظامي بي ضابطگين جو معاملو سامهون آيو آهي، جتي فارم جي وسيلن جي استعمال، کير جي پيداوار ۽ وڪري، ڪاٺ جي ڪٽائي، زرعي زمين جي مبينا غيرقانوني استعمال ۽ بجلي چوري بابت سنگين سوال اٿاريا ويا آهن.
ذريعن ۽ دستياب دستاويزن موجب ڪنڊي فارم ۾ سرڪاري وسيلن جي استعمال ۽ ان مان حاصل ٿيندڙ آمدني بابت شفافيت تي سوال پيدا ٿي رهيا آهن. مبينا طور فارم جي زرعي زمين کي مقرر مقصد بدران ٻين ڪمن لاءِ استعمال ڪيو ويو، جڏهن ته کير جي پيداوار، وڪري ۽ آمدني جو مڪمل رڪارڊ پڻ جاچ طلب قرار ڏنو ويو آهي.
فارم جي حدن اندر موجود وڻن ۽ ڪاٺ جي ڪٽائي بابت پڻ مبينا بي ضابطگين جون نشاندهيون ڪيون ويون آهن. ذريعن جو چوڻ آهي ته ڪاٺ بابت سرڪاري رڪارڊ، ڪٽائي جي اجازت، مقدار ۽ حاصل ٿيندڙ آمدني جو فرانزڪ آڊٽ ڪرايو وڃي ته اصل صورتحال واضح ٿي سگهي ٿي.
ٻئي طرف فارم جي زرعي زمين جي استعمال بابت پڻ ڪيترائي سوال سامهون آيا آهن، جن ۾ زمين جي ڪل ايراضي، ان جو سرڪاري مقصد، ڪيتري زمين آباد آهي ۽ زرعي پيداوار مان حاصل ٿيندڙ آمدني جو رڪارڊ شامل آهي.
بجلي چوري جا الزام
ڪنڊي فارم ۾ بجلي جي استعمال ۽ ميٽرنگ بابت پڻ سوال اٿاريا ويا آهن. ذريعن موجب بجلي چوري جي الزامن جي جاچ لاءِ لاڳاپيل بجلي ڪمپني جو ميٽر رڪارڊ، بلنگ ڊيٽا، ميٽر انسپيڪشن رپورٽون ۽ ڪنهن به ڊٽيڪشن بل يا قانوني ڪارروائي جو رڪارڊ سامهون آڻڻ ضروري آهي.
شهرين ۽ لاڳاپيل حلقن مطالبو ڪيو آهي ته ڪنڊي فارم روهڙي جي معاملن جي غيرجانبدارانه جاچ ڪرائي وڃي ۽ فارم جي زمين، زرعي پيداوار، کير جي پيداوار ۽ وڪري، ڪاٺ جي ڪٽائي ۽ بجلي جي استعمال سميت سمورن مالي معاملن جو مڪمل آڊٽ ڪرايو وڃي.
ذريعن موجب جاچ دوران گذريل ڪيترن ئي سالن جو رڪارڊ پڻ طلب ڪيو وڃي، جيئن معلوم ٿي سگهي ته فارم مان حاصل ٿيندڙ آمدني ڪٿي جمع ٿي ۽ سرڪاري وسيلن جو استعمال ڪهڙي مقصد لاءِ ڪيو ويو.
