پنجاب حڪومت ڪرپشن، بدعنواني ۽ اختيارين مٿانهين استعمال خلاف گرينڊ آپريشن شروع ڪندي ڳجها سيل قائم ڪري ڇڏيا. جڏهن ته وزيراعليٰ مريم نواز جي زيرو ٽالرنس پاليسي جي تحت گرفتاريون به شروع ٿي ويون.
تفصيل موجب پنجاب ۾ ڪرپشن جي خلاف گرينڊ آپريشن شروع ڪيو ويو آهي، انهي سلسلي ۾ پنجاب جي وزيراعليٰ مريم نواز ڪارروائين جي ذاتي نگراني جو فيصلو ڪيو آهي.
هن عوام کي اپيل ڪئي آهي ته ڪرپشن، رشوت يا اختيارين کان مٿانهين استعمال جي اطلاع هيلپ لائن تي ڏيو هر شڪايت تي ڪارروائي ٿيندي جڏهن ته شڪايت ڪندڙ جو نالو ڳجهو رکيو ويندو.
هن چيو ته عوام جي هڪ اطلاع ڪرپشن ۽ رشوت خوري جو سمورو نيٽ ورڪ بي نقاب ڪري سگهي ٿي. لٽيل رقم جي مڪمل ريڪوري تائين ڪارروائي ختم نه ٿيندي.
پنجاب جي وزيراعليٰ پنهنجي بيان ۾ وڌيڪ چيو ته ڪرپشن صرف پئسن جي چوري نه پر عوام جي حقن ۽ اعتماد جي چوري به آهي. ترقياتي منصوبن جي نگراني لاءِ جديد مانيٽرنگ نظام استعمال ڪيو ويندو.
هن وڌيڪ چيو ته عوام جو ڀروسو حڪومت جو سڀني کان وڏو اثاثو آهي. انهي تي سمجهوتو نه ڪيو ويندو. ترقياتي منصوبن جا فنڊز شفاف طريقي سان خرچ نه ٿيا ته ڪنهن کي به معافي نه ملندي. پنجاب جي وزيراعليٰ اعلان ڪيو ته سٺي ڪم تي سي ايم ميرٽ بيج جڏهن ته ڪرپشن تي قانون جي ڪٽهڙي ۾ آندو ويندو. عوام جو پئسو خرد برد ڪندڙ هر شخص سلاخن جي پٺيان هوندو. ڪرپشن ڪيسز ۾ عهدو، تعلق يا سفارش ڪنهن کي به بچائي نه سگهندي.
