شهيد الله بخش سومرو (سيبس) يونيورسٽي آف آرٽ، ڊيزائن اينڊ هيريٽيجز ڄامشورو جي اڪيڊمڪ ڪائونسل جو ٽيون اجلاس وائيس چانسلر پروفيسر ڊاڪٽر ارابيلا ڀٽو جي صدارت هيٺ منعقد ٿيو، جنهن ۾ ڪيترن ئي اهم تدريسي ۽ نصابي معاملن جو جائزو وٺي منظوري ڏني وئي. اجلاس ۾ خاص طور تي هائر ايجوڪيشن ڪميشن (هيڪ) جي پاليسين سان هم آهنگ ڪندي تعليمي پروگرامن کي جديد بڻائڻ، آئوٽ ڪم بيسڊ ايجوڪيشن کي وڌيڪ مضبوط ڪرڻ، نوان ايسوسيئيٽ ڊگري پروگرام متعارف ڪرائڻ ۽ مختلف شعبن جي اسڪيمن ۽ ڪورس مواد ۾ ترميم ڪرڻ تي غور ڪيو ويو.
اڪيڊمڪ ڪائونسل چار سالا بيچلر آف فائن آرٽس ۽ ايسوسيئيٽ ڊگري پروگرام جي نظرثاني ٿيل اسڪيم آف اسٽڊيز جي منظوري ڏني، جيڪي 2025ع کان شروع ٿيندڙ بيچز لاءِ لاڳو ٿيندا. اهي اسڪيمون هيڪ جي انڊر گريجوئيٽ ايجوڪيشن پاليسي 2025ع ۽ نظرثاني ٿيل فائن آرٽس نصاب مطابق تيار ڪيون ويون آهن. ان سان گڏ فائن آرٽس شعبي جي اٺين سيمسٽر جي فائنل ٿيسز پروجيڪٽن جي جاچ پڙتال جي معيار جي پڻ منظوري ڏني وئي. آرڪيٽيڪچر شعبي بابت ڪائونسل، بيچلر آف آرڪيٽيڪچر پروگرام جي ٽئين کان پنجين سال تائين نظرثاني ٿيل ڪورس مواد، پروگرام ايجوڪيشنل آبجيڪٽوز، پروگرام لرننگ آئوٽ ڪمز ۽ 2025ع کان شروع ٿيندڙ بيچز لاءِ نظرثاني ٿيل اسڪيم آف اسٽڊيز جي منظوري ڏني. پهرين سال جي پهرين ۽ ٻي سيمسٽر جي ڪورس مواد جي پڻ منظوري ڏني وئي.
انٽيريئر ڊيزائن جي شعبي ۾ ڪائونسل بيچلر آف انٽيريئر ڊزائن پروگرام لاءِ 2025ع کان اڳتي ايندڙ بيچز جي نظرثاني ٿيل اسڪيم آف اسٽڊيز، پروگرام ايجوڪيشنل آبجيڪٽوز، پروگرام لرننگ آئوٽ ڪمز جي منظوري ڏني، جڏهن ته فائونڊيشن ايئر ۽ ڇهين کان اٺين سيمسٽر تائين نظرثاني ٿيل ڪورس مواد پڻ منظور ڪيو ويو. ان کان علاوه 2026ع کان شروع ٿيندڙ بيچز لاءِ ٻن سالن واري ايسوسيئيٽ ڊگري پروگرام ۽ ان جي پهرين سال جي ڪورس مواد جي پڻ منظوري ڏني وئي. بيچلر آف آرڪيٽيڪچر ۽ انٽيريئر ڊزائن پروگرامن لاءِ انٽرنشپ جي ضابطن کي پڻ منظور ڪيو ويو.
ڪائونسل ڊپارٽمينٽ آف ٽيڪسٽائل ڊيزائن، بيچلر آف ٽيڪسٽائل ڊيزائن ۽ بيچلر آف فيشن ڊيزائن پروگرامن جي مشن اسٽيٽمينٽس جي منظوري پڻ ڏني، جڏهن ته ٽيڪسٽائل ڊيزائن شعبي لاءِ اسٽريٽجڪ پلان جي رخ جي پڻ منظوري ڏني وئي . هيڪ جي نظرثاني ٿيل نصاب مطابق 2025ع جي بيچ لاءِ پهرين ۽ ٻي سيمسٽر جي نصاب جي منظوري ڏني وئي. ان سان گڏ ٽيڪسٽائل ڊيزائن ۾ ايسوسيئيٽ ڊگري پروگرام ۽ ان جي چئن سيمسٽرن جي نصاب جي پڻ منظوري ڏني وئي. ڪميونيڪيشن ڊيزائن شعبي بابت ٻن نون ايسوسيئيٽ ڊگري پروگرامن شروع ڪرڻ لاءِ پيش ڪيل سفارشن جي منظوري ڏني وئي، جڏهن ته شعبي جي مختلف پروگرامن لاءِ تجويز ڪيل اسڪيم آف اسٽڊيز کي پڻ غور هيٺ آڻي وڌيڪ عملدرآمد لاءِ منظور ڪيو ويو.
اجلاس ۾ 2026ع ۽ ان کان پوءِ لاءِ سيمسٽر ۽ امتحاني ضابطن جو پڻ جائزو وٺي سفارش ڪئي وئي. ان کان علاوه فال 2025-26 ۽ فال 2026 جي داخلا سيشنن لاءِ داخلا پاليسين جي منظوري ڏني وئي، جڏهن ته 2025-26 جي اڪيڊمڪ ڪئلينڊر جي پڻ توثيق ڪئي وئي. اڪيڊمڪ ڪائونسل هيڪ پاران انڊر گريجوئيٽ آرٽ ۽ ڊيزائن پروگرامن ۾ پروگرام لرننگ آئوٽ ڪمز ذريعي گريجوئيٽ خاصيتن کي معياري بڻائڻ ۽ آئوٽ ڪم بيسڊ ايجوڪيشن لاڳو ڪرڻ بابت پڻ غور ڪيو. ان سان گڏ انڊسٽريل ريووليوشن 5.0 جي تناظر ۾ ڊگري پروگرامن ۽ نصاب جو جائزو وٺڻ لاءِ قائم ڪيل نيشنل ٽاسڪ فورس جي مقصدن ۽ جوڙجڪ جو پڻ جائزو ورتو ويو. هيڪ جي معياري فريم ورڪ مطابق سيبس يونيورسٽي جي سمورن بيچلر ڊگري پروگرامن لاءِ معياري ڪورس ڪوڊنگ پيٽرن تي پڻ غور ڪيو ويو.
اجلاس ۾ سنڌ حڪومت جي يونيورسٽيز اينڊ بورڊز کاتي جي ڊپٽي سيڪريٽري لبيڪا اڪرام، اڪيڊمڪ ڪائونسل جي نامزد ميمبرن بابر اين. شيخ، آرڪيٽيڪٽ ماريا اسلم ۽ تازئين حسين، قائم مقام رجسٽرار محمد سليمان ڀٽو، مختلف تعليمي شعبن جي سربراهن شوڪت علي کوکر، محمد سليم جهتيال ۽ آرڪيٽيڪٽ فهد شمس نظاماڻي، فيڪلٽي ميمبرن فضل الاهي خان، راجڪمار، زبير احمد ڀٽو، صبا قيوم لغاري ۽ رابعه پير بخش، سينيئر لائبريرين سيد غلام مرتضيٰ شاهه، انچارج امتحانات منور حسين لغاري ۽ ڊائريڪٽر ڪيو اِي سِي ڊاڪٽر شبينا شيخ مبصر طور شرڪت ڪئي. ان موقعي تي آرڪيٽيڪٽ عرفان بروهي ۽ چندر ڪمار پڻ پنهنجن لاڳاپيل شعبن بابت تفصيل ڏنا.
