جماعت اسلامي جي پيٽروليم ليوي جي خلاف هڙتال ڪم ڪري ڏيکاريو، حڪومتي وفد ڳالهين جي لاءِ منصوره پهتو جنهن دوران جماعت اسلامي پيٽروليم ليوي جي خاتمي سميت 3 مطالبا حڪومتي ڪميٽي جي سامهون رکي ڇڏيا آهن جنهن ۾ آئي پي پيز جي پيمنٽس ۽ ماني جون قيمتون گهٽ ڪرڻ ۽ بجلي جي قيمتن ۾ به گهٽتائي به شامل آهي. حافظ نعيم الرحمان مطالبا پورا ٿيڻ تائين ڌرڻا جاري رکڻ جو اعلان ڪري ڇڏيو آهي.
حڪومتي ڪميٽي چيو ته اوهان جا مطالبا جائز آهن پر پيٽروليم شين جون قيمتون عالمي حوالي سان طئي ڪرڻيون پونديون. اسان جي پهرين ترجيح عوام کي رليف ڏيڻ آهي. حڪومتي وفد ۽ جماعت اسلامي جي اڳواڻن ملاقات کان پوءِ صحافين جي سامهون گڏيل پريس ڪانفرنس به ڪئي.
وفاقي وزير منصوبه بندي احسن اقبال ڳالهين کان پوءِ گڏيل پريس ڪانفرنس ۾ چيو ته حڪومت عوامي مسئلن جي حل لاءِ سنجيدگي سان قدم کڻي رهي آهي. پيٽروليم ليوي جي حوالي سان جماعت اسلامي جي تجويزن کي ٻڌو آهي. هن چيو ته اسان چاهيون ٿا ته عوام کي رليف ملڻ گهرجي جيستائين ممڪن ٿيندو حڪومت عوام کي رليف ڏيندي جماعت اسلامي جي تحريڪ عوامي رليف جي لاءِ آهي جنهن تي غور ڪيو ويندو.
سوالن جا جواب ڏيندي احسن اقبال چيو ته اها ڳالهه ذهن ۾ رهي ته اسان ريڪوري جي طرف آهيون ڇو ته 4 سال اڳ هي ملڪ ڊيفالٽ ٿي چڪو هو، عالمي ڪريڊٽ ريٽنگ جا ادارا اسان جي ريٽنگ مسلسل بهتر ڪري رهيا آهن اهي اشارا آهن ته اسان جي معيشت بهتري طرف آهي پر اڃان به انهي بحران مان پوري طرح نه نڪتا آهيون.
وزيراعظم جي سياسي معاملن واري صلاحڪار راڻا ثناءُالله چيو ته اسان جو مقصد ساڳيو ئي آهي ته مهانگائي ۽ پيٽرول جي قيمت ۾ گهٽتائي ڪئي وڃي حڪومت جو موقف به ساڳيو آهي. جنگ جي ڪري پيٽرول جون قيمتون وڌي ويون عام ماڻهو تي بار پيو. جماعت اسلامي چيو آهي ته انهن وٽ اهڙيون تجويزون آهن جنهن سان مهانگهائي ۽ پيٽرول ۾ گهٽتائي اچي سگهي ٿي اسان انهن جا ٿورائتا آهيون، حڪومت تيار آهي جيڪڏهن جماعت اسلامي وٽ اهڙيون تجويزون آهن ته اسان انهي ۾ وڌيڪ بهتري به آڻي سگهون ٿا.
جماعت اسلامي جي امير حافظ نعيم چيو ته خواجه سلمان، احسن اقبال ۽ راڻا ثناءُالله تي ٻڌل وفد اڄ اسان سان منصوره ۾ ملاقات ڪئي. اڄ اسان جي ڌرڻن جو 19هون ڏينهن آهي، اها اسان جي ذاتي ايجنڊا ناهي عوام جا روزاني جا مسئلا آهن جنهن ۾ مهانگائي، پيٽروليم ليهي پهرين نمبر تي آهي، اسان جو مطالبو آهي ته عوام کي رليف ڏنو وڃي. حڪومت چوي ٿي ته اسان جا اڳ ئي معاهدا ڪيل آهن پر اسان کي خبر آهي ته ڪٿان کان ڪٽ لڳائي ليوي گهٽ ڪري سگهجي ٿي. اسان پنهنجي ماهرن تي ٻڌل ڪميٽي ڏئي رهيا آهيون جيڪا حڪومتي ٽيم سان انگن اکرن جي روشني ۾ ڳالهيون ڪندي. هن چيو ته اسان جا 3 وڏا مطالبا آهن پهريون پيٽروليم ليوي، ٻئي آئي پي پيز ۽ ٽئين ماني جي قيمت گهٽ ڪئي وڃي، اسان ميڪنزم ٺاهي ماني جي قيمت هيٺ آڻي سگهون ٿا.
حافظ نعيم چيو ته ايران آمريڪا جنگ ۾ هڪ وقت اهڙو آيو جڏهن عالمي مارڪيٽ ۾ تيل في بيرل ريٽ 47 تائين اچي ويو پر هتي قيمت گهٽ نه ٿي، انهي ۾ گهڻو چڪر آهي اسان ميڊيا کي ٻڌائينداسين، اسان ناجائز مطالبو نه ڪنداسين عالمي ۽ ملڪي معاملن کي سمجهون ٿا اسان کي خبر آهي ته ليوي جي قيمت ڪٿان گهٽ ڪري سگهجي ٿي.
