پيرسن بيواھ عورت پاران پاڪ ڪتاب کڻي پنهنجي ڌيء سان گڏجي بااثر ڏيرن جي مبينا ناجائزين خلاف پريس ڪلب اڳيان احتجاج ڪيو ويو

لاڙڪاڻو(رپورٽ عادل خان) لاڙڪاڻي شهر جي طليف ڪالوني جي رهواسڻ پيرسن بيواھ عورت پاران پاڪ ڪتاب کڻي پنهنجي ڌيء سان گڏجي بااثر ڏيرن جي مبينا ناجائزين خلاف پريس ڪلب اڳيان احتجاج ڪيو ويو. ان موقعي تي احتجاج ڪندڙ پيرسن بيواھ عورت ڀاهل خاتون زال مرحوم عبدالفتاح جتوئي پنهنجي ڌيء خالده سان گڏجي ميڊيا آڏو دانهيندي چيو ته اسان اصل ڳوٺ صاحب خان جتوئي جا رهواسي آهيون، پر ڪجھ سالن کان وٺي لڏ پلاڻ ڪري لاڙڪاڻي شهر ۾ رهائش اختيار ڪئي آهي. هن الزام لڳايو ته ڄاڻايل ڳوٺ ۾ منهنجي مرحوم مڙس جي ڏاڏي غلام قادر جتوئي جي نالي تي 30 جريب زرعي زمين آهي، جنهن زمين جي چئن جريبن جو فصل منهنجي مڙس يعني اسان کي ڏنو ويندو هيو، پر هن سال بااثر ڏيرن شوڪت، صفت، نصرالله، برڪت ۽ غني جتوئي اسان کي ان ڏيڻ کان انڪار ڪندي زبردستي زمين تي قبضو ڪري ڇڏيو آهي، اهڙيون شڪايتون علائقي جي معززن سميت لاڙڪاڻو پوليس جي اعليٰ عملدارن سان ڪيون آهن، پر ان باوجود هن وقت تائين ڪوبه تدارڪ ناهي ڪيو ويو، جيڪا سراسر ناانصافي آهي. هن وس وارن کي اپيل ڪئي ته معاملي جو نوٽيس وٺي بااثر ڏيرن خلاف ڪاروائي ڪرڻ سان گڏ مون بيواھ کي پنهنجو حق ڏياري انصاف ڪيو وڃي.