لنڊن (ويب ڊيسڪ) سوشل ميڊيا تي مختصر وڊيوز(ريلز) جي وڌندڙ مقبوليت نوجوانن لاءِ ڪمائيءَ جا نوان موقعا پيدا ڪري ڇڏيا آهن، جتي ڊگهن وڊيوز مان دلچسپ حصا چونڊي ننڍڙا ڪلپ ٺاهيندڙ نوجوان، جن کي ”ڪلپرز“ چيو وڃي ٿو، انهن کي وائرل ڪرائڻ عيوض معاوضو حاصل ڪن ٿا.
برطانوي راڄڌاني لنڊن سان تعلق رکندڙ 22 ورهين جو ايڪنور سنگهه به پروفيشنل ڪلپر آهي، جيڪو مختلف گراهڪن لاءِ 30 کان 60 سيڪنڊن جون مختصر عام وڊيوز تيار ڪري ٿو.
سندس چوڻ آهي ته وڊيو کي جيترا وڌيڪ ويوز ملندا، سندس ڪمائي به اوتري وڌندي.
ايڪنور موجب، گذريل سال هن ڳائڻي دعا ليپا جي هڪ مختصر وڊيو انسٽاگرام تي پوسٽ ڪري 300 ڊالر ڪمايا هئا، جنهن کانپوءِ کيس اندازو ٿيو ته اهو ڪم ڪيترو منافعي بخش ٿي سگهي ٿو.
هن دعويٰ ڪئي ته هاڻي هو هن ڪم مان هر مهيني گهٽ ۾ گهٽ 10 هزار پائونڊ ڪمائي ٿو.
ڪلپرز کي عام طور ڪپڙن جي برانڊن، ميوزڪ ڪمپنين، فلم اسٽوڊيوز، پوڊڪاسٽرن ۽ سوشل ميڊيا انفلوئنسرن طرفان ڊگهيون وڊيوز ڏنيون وينديون آهن.
اهي وڊيوز ڏسڻ کانپوءِ ڪلپرز انهن مان دلچسپ ۽ اثرائتا حصا چونڊي مختصر ڪلپ ٺاهيندا آهن ۽ انسٽاگرام، يوٽيوب، ٽڪ ٽاڪ سميت ٻين پليٽفارمن تي اپلوڊ ڪندا آهن.
هر هزار ويوز تي 3 ڊالر تائين ڪمائي
هن ڪم ۾ آمدني جو دارومدار وڊيوز جي مقبوليت تي هوندو آهي.
رپورٽ موجب، ڪجهه پليٽفارمز تي هر هزار ويوز عيوض 3 ڊالر تائين ڪمائي ممڪن آهي، پر اهڙي آمدني سڀني ڪلپرز کي حاصل نه ٿيندي آهي.
ڪنساس جي شهر وچيتا سان واسطو رکندڙ 24 ورهين جو ايٿن ويمز به ڪلپنگ ذريعي ڪمائي ٿو.
سندس چوڻ آهي ته هو هن ڪم مان هر مهيني گهٽ ۾ گهٽ هڪ هزار ڊالر ڪمائي ٿو.
هو يوٽيوب ۽ پوڊڪاسٽ جي ميزبان ڪيليب هيـمر لاءِ مختصر وڊيوز تيار ڪري ٿو، جنهن جي پروگرام ۾ مهمانن جي ذاتي مالي معاملن جو جائزو ورتو ويندو آهي.
ويمز موجب، هن ڪم کيس گهر ويٺي آمدني حاصل ڪرڻ ۽ پنهنجي زال ۽ هڪ سال جي پٽ سان وڌيڪ وقت گذارڻ جو موقعو ڏنو آهي.
هر ڪنهن لاءِ وڏي ڪمائي ممڪن ناهي
سوشل ميڊيا صلاحڪار ليا هيبرمين خبردار ڪيو آهي ته ڪلپنگ مان وڏي آمدني حاصل ڪندڙ ماڻهن جو انگ تمام گهٽ آهي.
سندس چوڻ هو ته ٻين ڪيترن ئي ڊجيٽل تخليقڪارن وانگر اڪثريت يا ته تمام گهٽ ڪمائي ٿي يا کين ڪا آمدني ئي نٿي ملي.
اسٽريمنگ انڊسٽريءَ جي تجزيي نگار ڊيوِن نيش جو چوڻ آهي ته هن شعبي ۾ ڪاميابي حاصل ڪرڻ لاءِ ڪلاڪن جا ڪلاڪ مواد ڏسڻو پوي ٿو ۽ ڪامياب ڪلپرز کي سوشل ميڊيا جي دنيا سان مسلسل ڳنڍيل رهڻو پوي ٿو.
ڪمپنين لاءِ به سستو ۽ اثرائتو طريقو
ڪلپرز کي گراهڪن سان ڳنڍڻ لاءِ ڪيتريون ئي ويب سائيٽون ڪم ڪري رهيون آهن، جن ۾ ڪلپنگ ڪلچر، وائرو، وھوپ ۽ ڪِڪ شامل آهن.
اهي پليٽفارم ڪمپنين کان فيس وٺي کين وڊيوز جا مختصر ڪلپ تيار ڪندڙ ماڻهن سان ڳنڍين ٿا.
ڪلپنگ ڪلچر جي گراهڪن ۾ ڪيپيٽل رڪارڊز، يونيورسل ميوزڪ گروپ ۽ ايڇ بي او ميڪس جهڙا نالا شامل آهن.
ڪمپنين لاءِ نوجوان ڪلپرز ذريعي سوشل ميڊيا تي مواد پکيڙڻ، روايتي اشتهارن جي ڀيٽ ۾ سستو ثابت ٿي سگهي ٿو ۽ ان سان وڌيڪ ماڻهن تائين پهچڻ جا موقعا به پيدا ٿين ٿا.
ڪلپنگ ڪلچر جي باني ۽ چيف ايگزيڪيوٽو ايوَن اسٽينفيلڊ موجب، سندس ويب سائيٽ دنيا جي 3 لک 40 هزار کان وڌيڪ ڪلپرز کي مختلف برانڊن سان ڳنڍي ٿي.
سندس خيال آهي ته مختصر وڊيوز جي وڌندڙ مقبوليت جو هڪ وڏو سبب ماڻهن جي ڌيان جو گهٽ وقت تائين برقرار رهڻ آهي.
برطانيا جي اڳوڻي حڪومتي صلاحڪار ۽ پوڊڪاسٽ ميزبان جمي ميڪ لافلن پڻ مختصر ڪلپس کي پنهنجي پروگرام جي مشهوري لاءِ استعمال ڪري ٿو.
سندس چوڻ آهي ته ڊگهي پوڊڪاسٽ مان تيار ڪيل مختصر وڊيوز پروگرام جي ٽريلر وانگر ڪم ڪن ٿيون ۽ ڪڏهن ڪڏهن مڪمل پروگرام جي ڀيٽ ۾ ڪيترائي ڀيرا وڌيڪ ويوز حاصل ڪن ٿيون.
ايڪنور سنگهه موجب، هن ڪم جي خاص ڳالهه اها آهي ته صرف موبائل فون ۽ سٺي انٽرنيٽ جي مدد سان ڪٿي به ويڊيو ڪلپ ٺاهي سگهجي ٿو، جنهن سبب هو موڪلن دوران به ڪم ڪري آمدني حاصل ڪري سگهي ٿو.
