دادو (ڊسٽرڪٽ رپورٽر مختيار علي جتوئي
): ريجنل ڊائريڪٽر محتسبِ اعليٰ دادو نصير احمد ناريجو ۽ ڊسٽرڪٽ اڪائونٽس آفيسر الطاف حسين منگي جي گڏيل سرپرستي هيٺ ڊسٽرڪٽ اڪائونٽس آفيس دادو ۾ ماهوار کليل ڪچهري منعقد ڪئي وئي، جنهن ۾ سرڪاري ملازمن ۽ پينشنرن جون شڪايتون ۽ مسئلا ٻڌي، انهن جي فوري ۽ مؤثر حل لاءِ لاڳاپيل آفيسرن کي ضروري هدايتون جاري ڪيون ويون.
کليل ڪچهري دوران درخواستگذارن جا مسئلا تفصيل سان ٻڌا ويا، جڏهن ته موقعي تي حل ٿيڻ جوڳين شڪايتن جو ترت ازالو ڪيو ويو ٻين درخواستن بابت لاڳاپيل آفيسرن کي هدايت ڪئي وئي ته مقرر ڪيل قانوني ۽ انتظامي ضابطن موجب درخواستگذارن جا جائز مسئلا بنا ڪنهن دير جي حل ڪيا وڃن.
ان موقعي تي ريجنل ڊائريڪٽر محتسبِ اعليٰ دادو نصير احمد ناريجو ٻڌايو ته هن وقت تائين ڪل 8 درخواستون وصول ٿيون آهن، جن مان 5 شڪايتن جو ازالو ڪيو ويو آهي، جڏهن ته باقي 3 درخواستون حل طلب آهن هن چيو ته کليل ڪچهري منعقد ڪرڻ جو بنيادي مقصد سرڪاري ملازمن ۽ پينشنرن کي بروقت رليف فراهم ڪرڻ ۽ سندن مسئلن جو شفاف، منصفاڻو ۽ قانون موجب حل يقيني بڻائڻ آهي هن وڌيڪ چيو ته جيڪي شهري ذاتي طور آفيس پهچي نٿا سگهن، اهي آن لائين پڻ پنهنجون شڪايتون داخل ڪرائي سگهن ٿا. ان سهولت بابت عوام کي آگاهي ڏيڻ لاءِ ميڊيا جو ڪردار اهم آهي، جيئن وڌيڪ ماڻهو پنهنجي مسئلن جي حل لاءِ موجود سهولتن مان فائدو حاصل ڪري سگهن.
ڊسٽرڪٽ اڪائونٽس آفيسر الطاف حسين منگي ڳالهائيندي چيو ته ماهوار کليل ڪچهري ملازمن ۽ پينشنرن جا مسئلا ٻڌڻ ۽ انهن جي بروقت حل لاءِ هڪ مؤثر فورم آهي. هن چيو ته ڊسٽرڪٽ اڪائونٽس آفيس ۾ شفافيت، ميرٽ ۽ عوام دوست خدمتن کي اوليت ڏني پئي وڃي، جيئن ڪنهن به سرڪاري ملازم يا پينشنر کي پنهنجي جائز ڪم لاءِ غيرضروري انتظار يا ڏکيائي کي منهن ڏيڻو نه پوي.
هن وڌيڪ ٻڌايو ته آفيس جي سموري عملي کي هدايتون جاري ڪيون ويون آهن ته هر درخواستگذار سان خوش اخلاقي ۽ احترام سان پيش اچن، سندس جائز ڪم مقرر وقت اندر مڪمل ڪن ۽ سرڪاري ملازمن توڙي پينشنرن کي بهترين سهولتون فراهم ڪن کليل ڪچهري ۾ ريجنل ڊائريڪٽر محتسبِ اعليٰ دادو جي آفيس جو سپرنٽنڊنٽ آفتاب احمد ملاح، اسٽنٽ ريجسٽرار دادو محمد حسن بروهي, اڪائونٽس آفيسر علي شير جهيجو، اطلاعات کاتي دادو جا نمائندا، ڊسٽرڪٽ اڪائونٽس آفيس جا آفيسر ۽ ٻيو عملو پڻ موجود هو.
