سيڪريٽري ڊائريڪٽر ميڊم ڊاڪٽر درِ ناز صاحبه، ايڊمن ۽ مانيٽرنگ آفيسر ڊاڪٽر راجا هريش ڊي ايڇ ڪيو اسپتال سانگهڙ ۾ قائم آر بي سي سيٽلائيٽ سينٽر جو تفصيلي دورو ڪيو

سانگهڙ،رپورٽ غلام رسول ناريجو
سانگهڙ سنڌ بلڊ ٽرانسفيوژن اٿارٽي (SBTA) جي سيڪريٽري ۽ ڊائريڪٽر ميڊم ڊاڪٽر درِ ناز صاحبه جي خاص هدايتن تي، ايڊمن ۽ مانيٽرنگ آفيسر ڊاڪٽر راجا هريش ڊي ايڇ ڪيو اسپتال سانگهڙ ۾ قائم آر بي سي سيٽلائيٽ سينٽر جو تفصيلي دورو ڪيو. ان موقعي تي، هن رت جي عطيا گڏ ڪرڻ، رت جي اسڪريننگ ۽ مريضن کي محفوظ رت فراهم ڪرڻ جي نظام جو جائزو ورتو ۽ موجود سهولتن تي اطمينان جو اظهار ڪيو.
دوري دوران، ڊاڪٽر آفتاب اعظم سريوال چيو ته اسپتال ۾ مريضن کي بروقت ۽ محفوظ رت جي فراهمي کي يقيني بڻائڻ لاءِ قدم کنيا پيا وڃن، جڏهن ته انهن سهولتن کي سنڌ بلڊ ٽرانسفيوژن اٿارٽي جي تعاون سان وڌيڪ بهتر بڻايو ويندو.
بعد ۾، وفد ضلعي صحت آفيسر ڊاڪٽر محمد فاروق سان ملاقات ڪئي، جنهن ۾ انهن عوامي صحت، انتظامي معاملن ۽ محفوظ رت جي فراهمي جي بهتري تي بحث ڪيو.
عوام لاءِ اهم پيغام
ٿيليسيميا، هيموفيليا ۽ ٻين رت جي بيمارين ۾ مبتلا مريضن کي اڪثر رت جي ضرورت هوندي آهي. اهڙن مريضن لاءِ رت جي بروقت ۽ محفوظ دستيابي تمام ضروري آهي. عوام کي گذارش آهي ته رت جي ضرورت جي صورت ۾ ڊي ايڇ ڪيو اسپتال سانگهڙ ۾ قائم آر بي سي سيٽلائيٽ سينٽر سان رابطو ڪن ته جيئن مريضن کي بروقت رهنمائي ۽ ضروري سهولتون فراهم ڪري سگهجن.