ڊويزنل ڪمشنر ميرپورخاص شهمير خان ڀٽو گڙدن جي بيمارين جي علاج لاءِ پراڻي سول اسپتال ۾ قائم ڊائلاسز سينٽر جو دورو

ميرپورخاص (رپورٽ خدابخش چوھاڻ) ڊويزنل ڪمشنر ميرپورخاص شهمير خان ڀٽو گڙدن جي بيمارين جي علاج لاءِ پراڻي سول اسپتال ۾ قائم ڊائلاسز سينٽر جو دورو ڪيو. ان موقعي تي ايڊيشنل ڪمشنر ون سڀاش چندر، ايڊيشنل ڪمشنر ٽو افشاں شيخ ۽ ضلعي صحت آفيسر ڊاڪٽر سنديپ ڪمار پڻ ساڻس گڏ هئا. دوري دوران ڪمشنر ڊائلاسز سينٽر جي مختلف شعبن جو معائنو ڪيو ۽ اتي علاج هيٺ مريضن جي عيادت پڻ ڪئي ۽  انهن کي فراهم ڪيل طبي سهولتن بابت پڇيو. هن سينٽر ۾لڳل  آر او پلانٽ جو به معائنو ڪيو. ان موقعي تي ڪمشنر شهمير خان ڀٽو چيو ته هن دوري جو بنيادي مقصد ڊائلاسز سينٽر جي ڪارڪردگي کي وڌيڪ بهتر بڻائڻ ۽ ان جي لاڳاپيل   مسئلن جو جائزو وٺي حل ڪرڻ لاءِ اثرائتا قدم کڻڻ آهي. بعد ۾، ڊويزنل ڪمشنر ضلعي هيڊ ڪوارٽر نيو سول اسپتال ميرپورخاص جو دورو ڪيو جتي هن اسپتال جي مرمت ٿيل مرد ۽ عورتن جي  ايمرجنسي وارڊ، ٻارن جي وارڊ، هڏن جي وارڊ، دل جي وارڊ ۽ ٻين شعبن جو تفصيلي معائنو ڪيو.ان موقعي تي، ڪمشنر اسپتال انتظاميا کي هدايت ڪئي ته  اسپتال ۾ گئس سلنڈر جي استعمال ۾ خاص احتياط ڪئي وڃي ۽ ان حوالي سان مقرر ڪيل قاعدن ۽ ضابطن تي سختي سان عمل درآمد کي يقيني بڻايو وڃي. ڪمشنر شهمير خان ڀٽو چيو ته اسپتال ۾ سي ٽي اسڪين، ايم آر آءِ، برنس وارڊ ۽ اين آءِ سي وي ڊي جي قيام لاءِ، پهريان هڪ ٽرشيري  ڪيئر يونٽ قائم ڪرڻ ضروري آهي، جنهن لاءِ اسپتال انتظاميا پاران هر ممڪن ڪوشش ڪئي پئي وڃي. سول اسپتال ۾ بنيادي صحت جي سهولتن جي فراهمي بابت ميڊيا پاران پڇيل سوال جي جواب ۾، ڪمشنر چيو ته ضلعي هيڊ ڪوارٽر اسپتال ۾ صورتحال تمام گهڻي حد تائين بهتر ٿي رهي آهي، ڊاڪٽر ۽ طبي عملو پنهنجي ڊيوٽي  ڪري رهيا آهن ۽ مريضن کي بهتر طبي سهولتون فراهم ڪرڻ لاءِ قدم کنيا پيا وڃن.هڪ ٻئي سوال جي جواب ۾، هن چيو ته ضلعي هيڊ ڪوارٽر اسپتال جي مرمت جي ڪمن سان لاڳاپيل ترقياتي اسڪيم تي نظرثاني ڪئي ويندي ته جيئن اسپتال جي باقي رهيل  مرمت جي ڪمن کي به مڪمل ڪري سگهجي. ان موقعي تي ميڊيڪل سپرنٽينڊنٽ ڊاڪٽر هيمجي چوهان، ڊاڪٽر ۽ پيرا ميڊيڪل اسٽاف پڻ موجود هئا.