سکر: ايس ايس پي سکر اظهر مغل باگڙجي ڪچي ۾ واقع گهمره پوليس پيڪٽ تي پريس ڪانفرنس ڪندي چيو آهي ته گذريل ٻن هفتن کان باگڙجي جي ڪچي ۾ مڪمل ۽ مسلسل آپريشن جاري آهي.
هن ٻڌايو ته انهيءَ علائقي ۾ ڪشمير جتوئي عرف کشو جتوئي جو گينگ سرگرم آهي، جيڪو گهوٹڪي، شکارپور ۽ خيرپور جي جرم پيشه ماڻهن کي پناهه فراهم ڪندو رهيو آهي. ايس ايس پي موجب گهوٹڪي ۾ آپريشن کانپوءِ اتي جا مطلوب ملزمان باگڙجي جي ڪچي ۾ اچي لڪيا هئا، جنهن سبب گڏيل آپريشن شروع ڪيو ويو.
آپريشن دوران 30 ماڻهو زخمي ٿيا، جڏهن ته 5 انتهائي خطرناڪ ملزمان مارجي ويا ۽ انهن جون لاشون برآمد ٿي چڪيون آهن، جڏهن ته ڪجهه ٻيا پڻ هلاڪ ٿيا پر انهن جون لاشون نه مليون.
هن ٻڌايو ته 25 ملزمان ۽ ذاتي جھڳڙن ۾ ملوث افراد قانون نافذ ڪندڙ ادارن جي اڳيان سرنڊر ڪري چڪا آهن.
ايس ايس پي سکر اظهر مغل انڪشاف ڪيو ته انهيءَ علائقي مان باقاعده ڀتہ وصول ٿيندو هو ۽ ڪشمير عرف کشو جتوئي ۽ رحيم بخش عرف رحيمون ڦلپوٹو تاجرن ۽ هندو برادري کان ڀتہ وٺندا رهيا. ڪجهه ڏينهن اڳ ڪشمير جتوئي تي ٿيل حملي ۾ کشمور جا ملزمان پڻ مارجي ويا هئا.
هن ٻڌايو ته کشو جتوئي جي گينگ ۾ 60 کان 70 هٿياربند شامل آهن، جڏهن ته رجب عرف رجو جتوئي جا ٺڪانا تباهه ڪري ڇڏيا ويا آهن.
هن چيو ته ڌاڙيل مقامي آبادگار کي زمين آباد ڪرڻ نه ڏيندا هئا، پر پوليس آپريشن کانپوءِ هاڻي ماڻهو اطمينان سان زراعت ڪري رهيا آهن.
ايس ايس پي ٻڌايو ته پريا ڪماري جي تلاش جاري آهي ۽ والدين سان مسلسل رابطو آهي، ۽ هو ڪنهن به گروهه وٽ هوندي، ان جي خلاف سخت ڪارروائي ڪئي ويندي.
اظهر مغل وڌيڪ ٻڌايو ته شهيد جان محمد مهر جو مرڪزي ملزم مارجي چڪو آهي ۽ باقي ملزمان جي گرفتاري لاءِ جلد خوشخبري ملندي.
هن چيو ته سهولت ڪار جو مڪمل فهرست موجود آهي، جيڪي ڌاڙيلن کي تاجرن ۽ انهن جي ٻارن بابت معلومات فراهم ڪندا رهيا، ۽ انهن جي خلاف به آپريشن جاري آهي.
هن واضح ڪيو ته ڪچي جي علائقن ۾ انفراسٽرڪچر بهتر بنا پائيدار امن ممڪن ناهي، انهي مقصد لاءِ سکر ڪميشنر جي سربراهي ۾ هڪ ڪميٽي قائم ڪئي وئي آهي.
ايس ايس پي موجب، شکارپور سائيڊ کان رجب عرف رجو جتوئي سرگرم رهيو، جڏهن ته ڪچي جي علائقن ۾ ڪشمير عرف کشو جتوئي ۽ رحيمون ڦلپوٹو جا گينگ فعال رهيا، انهيءَ سان گڏ ننڍڙا ننڍڙا گروهه پڻ هئا جيڪي شهري علائقن ۾ وارداتون ڪندا رهيا، جن جي خلاف ڪارروائيون جاري آهن.
