گونگن ٻوڙن کي ڪيستائين ديوار سان لڳائي 5 سيڪڙو معذور ڪوٽا به نارمل ماڻهن ۾ وڪرو ڪري اسان جو بنيادي حق غضب ڪيو ويندو

لاڙڪاڻو(رپورٽ مريد سولنگي) گونگن ٻوڙن کي ڪيستائين ديوار سان لڳائي 5 سيڪڙو معذور ڪوٽا به نارمل ماڻهن ۾ وڪرو ڪري اسان جو بنيادي حق غضب ڪيو ويندو، سنڌ جا معذور گونگا ٻوڙا پنجاب صوبي واريون مراعتون، سهولتون ۽ واهر چاهين ٿا، لاڙڪاڻو جي گونگن ٻوڙن کي هميشه نظر ڪيو ويو آهي ، اسپيشل نوجوانن سان اڳ ۾ ئي 5 سيڪڙو معذور ڪوٽا ۾ ظلم ڪري گونگن ٻوڙن جي ڪوٽا نارمل ماڻهن کي ڏني وئي، گونگا ٻوڙا نوجوان بک، بيروزگاري سبب اذيت ڀري زندگي گذارڻ تي مجبور ڪيا ويا آهن، اسان جا پڙهيل لکيل گونگا ٻوڙا سرڪاري نوڪريون نه ملڻ ڪري ذهني اذيت جو شڪار بڻجي ويا آهن، سنڌ جي اندر هر کاتي ڊپارٽمينٽ ۾ مقرر گونگن ٻوڙن جون نوڪريون ٻين صحيح سالم نارمل ماڻهن ۾ وڪرو ڪري ڏنيون وڃن ٿيون ۽ معذورن سان ماٽيلي ماء جهڙو سلوڪ ڪيو ويو آهي، اهڙيون ڳالهيون گونگن ٻوڙن جي سماجي تنظيم لاڙڪاڻو ڊيف آف ايسوسيئيشن جي مرڪزي اڳواڻ پنهل خان سانگي، خليل الرحمان عباسي، اشفاق لغاري، پپن پيچوهو ۽ ٻين پنهنجي مطالبن جي مڃتا لاءِ احتجاج ڪندي ڪيون، هنن چيو ته سنڌ حڪومت کي گهرجي ته فوري طور تي اسپيشل پرسن گونگن ٻوڙن کي ميرٽ اهليت مطابق نوڪريون ڏنيون وڃن، گونگن ٻوڙن ۾ غريب مستري ڪاريگرن کي سلائي ۽ ڀرت جون مشينون ڏنيون وڃن ۽ ڪيترن ئي گونگن ٻوڙن جو علاج ڪرائڻ لاءِ ملڪ جي گادي واري شهر اسلام آباد کان اسپيشل معائنه ٽيم گهرائي علاج ڪرايو وڃي، لاڙڪاڻي شهر ۾ گونگين ٻوڙين نياڻين سان گهرن ۾ ساهرن، ڏيرن، والدين، مٽن مائٽن جو ذهني ۽ جسماني تشدد ڪندڙن خلاف سنڌ هاءِ ڪورٽ، لاڙڪاڻو ڪورٽ سخت نوٽيس وٺندي انهن خلاف سخت ڪارروائي ڪري قدم کنيا وڃن، لاڙڪاڻو شهر جي اسپيشل نوجوانن کي شهر جي اندر جدا پلي گرائونڊ مختص مقرر  ڪري ٺهرائي ڏنو وڃي، گونگن ٻوڙن جي مرڪزي آفيس جي زبون حال عمارت جي مرمت ڪرائي وڃي، لاڙڪاڻو شهر ۾ هڪ هزار کان وڌيڪ گونگا ٻوڙا آهن جن ۾ پوڻا چار سئو گونگيون ٻوڙيون نياڻيون آهن ۽ ست سئو کان وڌيڪ گونگا ٻوڙا نوجوان مرد آهن جن کي قومي شناختي ڪارڊ جي ٺاهڻ جي سهولت به نه ڏني وئي آهي، گونگن ٻوڙن کي چيڪ ڪرڻ وارو الات مشين لاڙڪاڻو ۾ رکرائي سکر جي پنڌ هزارين روپيا خرچ ڀاڙن کان بچايو وڃي، سابق وزير اعظم شهيد بينظير ڀٽو ۽ شهيد ذوالفقار علي ڀٽو جي شهر لاڙڪاڻي جي اندر گونگن ٻوڙن کي ٽيسٽ ڪندڙ مشين نه هجڻ ڪري مجبورن لاڙڪاڻو جا ڊيف اسپيشل نوجوان سکر وڏا خرچ ڀاڙا ڪري ستن کان ڏهه هزار رپيا خرچ ڪري ۽ اتي وڃڻ تي مجبور ڪيا ويا آهن ۽ بار بار معذور ٽيسٽ ڪرائڻ لاءِ سکر جا پنڌ ڪرايا وڃن ٿا، ان لاءِ لاڙڪاڻو ضلع ڊويزن وڏا شهر آهن ته گونگن ٻوڙن کي پنهنجي ئي شهر لاڙڪاڻي ۾ ٽيسٽ وٺڻ لاءِ مشين جي سهولت ڏني وڃي، جنهن سان گونگن ٻوڙن جي ٽيسٽ ٿي سگهي ۽ پوءِ انهن کي گونگي ٻوڙي جو سرٽيفڪيٽ ڏنو وڃي، جيئن اهي پنهنجو قومي شناختي ڪارڊ ٺهرائي سگهن، جيڪو انهن جو بنيادي آئيني قانوني حق آهي، پنجاب صوبي جيان سنڌ لاڙڪاڻو شهر جي گونگن ٻوڙن اسپيشل غريب مسڪين لاوارث، يتيم بي سهارا نوجوانن کي بينظير انڪم سپورٽ پروگرام ۾ شامل ڪري معاوضو ڏنو وڃي، جڏهن ته لاڙڪاڻو ايسوسيئيشن آف دي ڊيف جي گونگن ٻوڙن رجسٽرڊ ٿيل نوجوانن جي بهتري لاءِ حڪومت پاران اسپيشل فنڊ ڏياريا وڃن. گونگن ٻوڙن جي تنظيم جي اڳواڻ پنهل خان سانگي، خليل الرحمان عباسي ۽ ٻين پاڪستان پيپلزپارٽي جي چيئرمين بلاول ڀٽو زرداري، ايم اين اي آصفه ڀٽو زرداري، وزير اعلي سنڌ سيد مراد علي شاهه، لاڳاپيل صوبائي وزير ۽ سيڪريٽري کان مطالبو ڪيو آهي ته لاڙڪاڻو شهر جي گونگن ٻوڙن جي احساس محرومين جو ازالو ڪندي مسئلا حل ڪيا وڃن نه ته ٻئي صورت ۾ گونگا ٻوڙا لاڙڪاڻي انتظاميه خلاف سخت احتجاج ڪندا.