رياست فلوريڊا جي سامونڊي علائقن جا پاڻي خزاني جي گهر طور سڃاتا وڃن ٿا۔
تازو، اتي غوطه خورن جي هڪ ٽيم ڪيترين صدين اڳ سمنڊ ۾ ٻڏي ويل هڪ اسپيني بحري جهاز مان لڳ ڀڳ 10 لک ڊالرن جي قيمت وارو خزانو هٿ ڪيو آهي۔
هي خزانو هزار کان وڌيڪ سون ۽ چاندي جا سڪا تي مشتمل آهي، جيڪي 18هين صدي ۾ اسپين جي زيرِ تسلط ملڪن، بوليويا، ميڪسيڪو ۽ پيرو ۾ ٺهيا هئا۔
اسپيني بحري جهاز سونهون، چاندي ۽ قيمتي پٿر کڻي واپس اسپين پيا ويا، پر جولاءِ 1715ع ۾ هڪ سمندري طوفان سبب هي بحري ٻيڙو غرق ٿي ويو ۽ خزانو سمنڊ جي تري ۾ وڃي پيو۔
هن 1715ع جي خزاني مان سون جا ڪيترائي سڪا اڳ به مختلف ماڻهن طرفان دريافت ڪيا ويا آهن۔
هاڻي بحري جهازن جي ملبن جي جاچ ڪندڙ ڪمپني جي غوطه خورن جي ٽيم نوان سڪا دريافت ڪيا آهن، جن مان ڪجهه تي تاريخ ۽ ٽڪسال جو نالو اڃا پڙهيو وڃي ٿو۔
ڪمپني جي بيان موجب، “هي صرف خزاني جي دريافت نه پر ان سان لاڳاپيل تاريخي ڪهاڻين جي دريافت به آهي۔”
هن مهم لاءِ ڪمپني غوطه خورن جي ٽيم، ڪشتين ۽ زيرِ آب ميٽل ڊيٽيڪٽر ڊوائيسز جو استعمال ڪيو۔
فلوريڊا جي رياستي قانونن مطابق، سرڪاري زمينن يا پاڻيءَ ۾ ملندڙ خزانو رياستي ملڪيت هوندو آهي۔
البتہ حڪومت اهڙين مهمن لاءِ اجازت ناما جاري ڪري ٿي، جنهن تحت دريافت ٿيل خزاني جو 20 سيڪڙو حصو حڪومت وٽ ويندو آهي۔
ان مطابق، هن خزاني جو به 20 سيڪڙو حصو رياست کي ۽ باقي ڪمپني ۽ ان جي سب ڪنٽريڪٽرز ۾ ورهايو ويندو۔
