انقره: (خميس: 09 آڪٽوبر 2025ع) ترڪي جي صدر رجب طيب اردوان اعلان ڪيو آهي ته ترڪي غزه جنگ بندي معاهدي جي عملدرآمد جي نگراني لاءِ ٺهيل ٽاسڪ فورس ۾ شامل ٿيندو. الجزيره موجب، صدر اردوان چيو ته انشاءَالله، اسان ان ٽاسڪ فورس جو حصو بڻجنداسين، جيڪا معاهدي جي عملداري کي يقيني بڻائيندي.
ترڪي قطر، مصر ۽ آمريڪا جي نمائندن سان گڏ مصر جي شهر شرم الشيخ ۾ جاري ڳالهين ۾ شرڪت ڪري رهيو آهي، جتي اسرائيل ۽ حماس وچ ۾ معاهدي کي حتمي شڪل ڏني پئي وڃي. صدر اردوان زور ڏنو ته غزه کي جامع ۽ فوري انساني امداد پهچائڻ، قيدين ۽ يرغمالين جو تبادلو ۽ اسرائيلي حملن جو فوري خاتمو انتهائي ضروري آهي. هن اهو به واعدو ڪيو ته ترڪي غزه جي ٻيهر تعمير جي عمل ۾ مڪمل ۽ فعال مدد ڪندو.
اردوان چيو دنيا ۾ ڪو به اهڙو ماڻهو ناهي جيڪو غزه جي عوام کان وڌيڪ امن، سلامتي ۽ استحڪام جو حقدار هجي. واضح رهي ته اسرائيل ۽ حماس غزه ۾ جنگ بندي جي پهرين مرحلي تي اتفاق ڪري ورتو آهي، جنهن جو مقصد ٻن سالن کان جاري خونريز تنازع کي ختم ڪرڻ آهي، جنهن ۾ هزارين ماڻهو مارجي چڪا آهن ۽ غزه جو وڏو حصو ملبو بڻجي ويو آهي. هن معاهدي تي خميس ڏينهن دستخط ڪيا ويندا، جنهن تحت قيدين ۽ يرغمالين جو تبادلو ۽ غزه ۾ وڏي پيماني تي انساني امداد جي فراهمي شروع ڪئي ويندي. هي معاهدو تڏهن ممڪن ٿيو آهي، جڏهن تل ابيب 2023 ۾ حماس جي حملي کانپوءِ فلسطيني علائقي تي بمباري شروع ڪئي هئي.
