واشنگٽن: (سومر: 30 مارچ 2026ع) آمريڪي اخبار وال اسٽريٽ جرنل جي هڪ رپورٽ ۾ انڪشاف ڪيو ويو آهي ته آمريڪي صدر ڊونلڊ ٽرمپ ايران ۾ تيار ٿيل يورينيم ڪڍڻ جي لاءِ امڪاني فوجي آپريشن تي غور ڪري رهيو آهي.
رپورٽ موجب آمريڪي اختيارين جو چوڻ آهي ته ايران مان تقريبن هڪ هزار پائونڊ يورينيم ڪڍڻ جو اهو مشن تمام گهڻو ڏکيو ۽ خطرناڪ ٿي سگهي ٿو جنهن جي لاءِ آمريڪي فوج کي ڪيترن ئي ڏينهن تائين ايران جي اندر موجود رهڻو پوندو پر صدر ٽرمپ اڃان تائين انهي آپريشن جو حتمي فيصلو نه ڪيو آهي، پر هڪ امڪاني آپشن جي طور تي غور رکيو ويو آهي.
رپورٽ ۾ وڌيڪ ٻڌايو ويو آهي ته صدر ٽرمپ پنهنجن ويجهن صلاحڪارن کي هدايت ڏني آهي ته اهي ايران تي دٻاءُ وڌائين ته جيئن اهي جنگ جي خاتمي جي شرط جي طور تي يورينيم حوالي ڪري. آمريڪي اختيارين موجب جيڪڏهن ايران ڳالهين جي دوران يورينيم حوالي ڪرڻ تي راضي نه ٿيو ته طاقت جي استعمال جو امڪان به موجود آهي.
اخبار موجب يورينيم تي قبضو حاصل ڪرڻ جي لاءِ محدود ۽ حدفي فوجي ڪارروائي جنگ جي ٽائيم کي وڌيڪ ڊگهو نه ڪندي پر انهي جا خطرا ۽ نتيجا انتهائي حساس ٿي سگهن ٿا. ٻئي طرف وائٽ هائوس جو چوڻ آهي ته پينٽاگون جو ڪم صدر کي مختلف آپشن فراهم ڪرڻ آهي ۽ مختلف آپشنز جي موجودگي جو مطلب اهو نه آهي ته ڪو حتمي فيصلو ڪيو ويو آهي انهي معاملي تي پينٽاگون ۽ سينٽرل ڪمانڊ جي ترجمانن في الحال ڪوبه تبصرو نه ڪيو آهي.
رپورٽ ۾ اهو به ياد ڏياريو ويو آهي ته آمريڪا ماضي ۾ به اهڙا حساس آپريشن ڪري چڪو آهي جن ۾ 199 ۾ قازقستان ۽ 1998 ۾ جارجيا مان يورينيم منتقل ڪرڻ جا آپريشن شامل آهن. تجزيه ڪارن موجب جيڪڏهن اهڙي نوعيت جو ڪوبه آپريشن ڪيو ويو ته انهي جا خطي جي سيڪيورٽي صورتحال ۽ عالمي سياست تي گهرا اثر پئجي سگهن ٿا.
