اسلامآباد: (خميس: 09 آڪٽوبر 2025ع) نائب وزيراعظم ۽ پرڏيهي وزير سينيٽر اسحاق ڊار سان آمريڪي ناظمالامور نيٽلي بيڪر ملاقات ڪئي، جنهن ۾ ٻنهي ملڪن جي لاڳاپن، علائقائي حالتن ۽ گڏيل دلچسپي جي معاملن تي ڳالهه ٻولهه ٿي. پرڏيهي کاتي جي بيان موجب، ملاقات دوران پاڪستان ۽ آمريڪا جي وچ ۾ تازين اعليٰ سطحي رابطن، جن ۾ نيويارڪ ۽ واشنگٽن ڊي سي ۾ ٿيل ملاقاتون شامل آهن، تي اطمينان جو اظهار ڪيو ويو.
نيٽلي بيڪر مشرق وسطىٰ ۽ وسيع علائقي ۾ امن ۽ استحڪام لاءِ پاڪستان جي مسلسل ڪوششن ۽ شرڪت جي واکاڻ ڪندي چيو ته آمريڪا چاهي ٿو ته پاڪستان اهڙن معاملن ۾ پنهنجو اهم ڪردار جاري رکي. نائب وزيراعظم ۽ پرڏيهي وزير اسحاق ڊار چيو ته پاڪستان چاهي ٿو ته ٻنهي ملڪن جي وچ ۾ مختلف شعبن، خاص طور تي معاشي ۽ ترقياتي ميدانن ۾، تعاون کي وڌيڪ مضبوط بڻايو وڃي. آمريڪي ناظمالامور پاڪستان ۾ توانائي، قيمتي معدنيات ۽ آءِ ٽي شعبي ۾ آمريڪي ڪمپنين جي سيڙپڪاري ۾ خاص دلچسپي جو اظهار پڻ ڪيو.
