اسلام آباد ۾ مذهبي تنظيم جي احتجاج کي نظر ۾ رکندي سيڪيورٽي انتظام وڌيڪ سخت ڪيا ويا آهن.
رپورٽ موجب مذهبي جماعت وفاقي راڄڌاني اسلام آباد طرف مارچ جو اعلان ڪري رکيو آهي جنهن سبب انتظاميه شهر ۾ سخت سيڪيورٽي جا انتظام ڪري رکيا آهن.
انتظاميه اسلام آباد جي داخلي رستن تي ڪنٽينر لڳائي ڇڏيا آهن جنهن سبب شهرين کي اچ وڃ ۾ سخت پريشانين کي منهن ڏيڻو پئجي رهيو آهي.
رپورٽن موجب راڄڌاني ۾ موبائيل ڊيٽا سروس به متاثر آهي شهرين کي موبائل تي انٽرنيٽ جي استعمال ۾ پريشانين کي منهن ڏيڻو پئجي رهيو آهي. انهي کان علاوه راولپنڊي جي مختلف نجي تعليمي ادارن ۾ موڪل ڏني وئي آهي.
ٻئي طرف گهرو وزارت اسلا آباد ۽ راولپنڊي ۾ موبائل انٽرنيٽ سروس بند ڪرڻ جي لاءِ پي ٽي اي کي خط لکي ڇڏيو. لاهور ۾ به سمورن سرڪاري، نجي اسڪولن ۾ فوري طور تي موڪل ڏني وئي آهي.
سي اي او ايجوڪيشن لاهور جو چوڻ آهي ته رستن جي بندش سبب اسڪولن ۾ موڪل ڏني وئي آهي اسڪولن طرفان والدين کي آگاهه ڪيو پيو وڃي.
گهرو وزارت جي خط ۾ چيو ويو آهي ته اسلام آباد ۽ راولپنڊي ۾ ٿري ۽ فور جي سروس معطل رهندي. انٽرنيٽ جي ٿري ۽ فور جي سروس اڄ رات 12 وڳي کان ٻئي حڪم اچڻ تائين بند رهندي. خط موجب موبائل انٽرنيٽ جي بندش سيڪيورٽي سببن جي آڌار تي ڪئي وئي. اسلام آباد ۽ راولپنڊي ۾ موبائل انٽرنيٽ سروس معطلي جا انتظام مڪمل ڪيا وڃن.
