پي سي بي جي چيئرمين محسن نقوي چيو آهي ته ڀارت سان جيڪو به معاملو ٿيندو، اهو مڪمل برابري جي سطح تي ٿيندو. جيڪڏهن ڀارتي هينڊ شيڪ ڪرڻ نٿا چاهين ته اسان کي به ڪو شوق ناهي.
لاهور ۾ پريس ڪانفرنس دوران محسن نقوي چيو ته ڀارتي انڊر 19 ٽيم جي رويي بابت آءِ سي سي سان ڳالهه ٻولهه ڪئي ويندي ۽ آءِ سي سي کي ڀارتي رويي تي باقاعده خط لکيو پيو وڃي.
هن ٻڌايو ته پي ايس ايل لاءِ وسيم اڪرم کي برانڊ ايمبيسيڊر مقرر ڪيو ويو آهي. 26 مارچ بدران پي ايس ايل 23 مارچ کان شروع ڪرڻ چاهيون ٿا، سڀني فرنچائزز سان صلاح مشوري بعد 23 مارچ تي پي ايس ايل شروع ڪرڻ جو فيصلو ڪيو ويندو.
پي سي بي چيئرمين موجب، پي ايس ايل ختم ٿيڻ کان پوءِ ملتان سلطانز جي نيلامي ڪئي ويندي. هن سال ملتان سلطانز کي پي سي بي پاڻ آپريٽ ڪندو. پي ايس ايل جي ٻن نون ٽيمن لاءِ 10 پارٽين ڪواليفاءِ ڪيو آهي، جڏهن ته پي ايس ايل ٽيمن جي بڊنگ 8 جنوري تي اسلام آباد ۾ ٿيندي.
محسن نقوي وڌيڪ چيو ته جنوري اسان لاءِ اهم مهينو آهي ۽ اسان جون ٽيمون سٺي قيمت تي وڪرو ٿينديون. نيوز چينلز کي اسپورٽس ايونٽس جي ڪوريج لاءِ وفاقي وزير اطلاعات سان درخواست ڪندس. ڪرڪيٽ اڪيڊمي کي علائقي جي بهترين اڪيڊمي بڻائڻ جو هدف آهي ۽ پاڪستان شاهينز کي به وڌيڪ مضبوط بڻائڻ چاهيون ٿا.
هن چيو ته ريڊ بال ڪوچ بابت اڃا فيصلو نه ٿيو آهي، ٽيم ان معاملي تي ڪم ڪري رهي آهي. آسٽريليا خلاف هوم سيريز لاءِ هن وقت تائين صرف ٽي ٽي ٽوئنٽي ميچون شيڊول ڪيون ويون آهن.
