سکر(ذوالفقار سولنگي) اسسٽنٽ سپرنٽنڊنٽ پوليس (ASP) سٽي سکر محمد صهيب امين جي نگراني هيٺ نئين سال جي آمد جي موقعي تي شهر سکر ۾ امن امان جي صورتحال برقرار رکڻ لاءِ جامع ۽ اثرائتا سيڪيورٽي انتظام ڪيا پيا وڃن۔
اسسٽنٽ سپرنٽنڊنٽ پوليس محمد صهيب امين شهر جي مختلف حساس ۽ اهم علائقن جو فيلڊ وزٽ ڪيو ۽ پوليس آفيسرن ۽ اهلڪارن کي الرٽ رهڻ جون هدايتون جاري ڪيون۔ هن موقعي تي هن واضح ڪيو ته نئين سال جي تقريبن دوران شهرين جي جان ۽ مال جو تحفظ پوليس جي اولين ذميواري آهي۔
محمد صهيب امين چيو ته شهر جي داخلي ۽ خارجي رستن، مرڪزي شاهراهن، اهم چوڪين، بازارن، تفريحي ماڳن ۽ رهائشي علائقن ۾ اضافي پوليس نفري مقرر ڪئي وئي آهي، جڏهن ته موبائل گشت ۽ سنيپ چيڪنگ جي عمل کي وڌيڪ سخت ڪيو ويو آهي۔
هن وڌيڪ چيو ته نئين سال جي موقعي تي ڪجهه عنصر هوائي فائرنگ، آتشبازي ۽ ٻين خطرناڪ حرڪتن وسيلي خوشي جو اظهار ڪن ٿا، جيڪو نه صرف قانوني طور جرم آهي پر قيمتي انساني جانين جي ضايع ٿيڻ جو سبب پڻ بڻجي سگهي ٿو۔ هن شهرين کي سختي سان هدايت ڪئي ته هوائي فائرنگ کان مڪمل پاسو ڪيو وڃي، ٻي صورت ۾ قانون جي ڀڃڪڙي ڪندڙن خلاف بنا ڪنهن فرق جي سخت قانوني ڪارروائي ڪئي ويندي۔
اسسٽنٽ سپرنٽنڊنٽ پوليس محمد صهيب امين چيو ته پوليس سوشل ميڊيا، خفيه اطلاعن ۽ جديد نگراني نظام وسيلي به صورتحال تي ويجهي نظر رکيو ويٺي آهي ته جيئن ڪنهن به ناخوشگوار واقعي کي وقت سر روڪي سگهجي۔
هن والدين کان به اپيل ڪئي ته هو پنهنجي ٻارن کي غير ذميواراڻين حرڪتن ۽ خطرناڪ راندين کان پري رکن ۽ پوليس سان مڪمل تعاون ڪن۔
محمد صهيب امين موجب نئين سال جي رات پوليس ڪنٽرول روم مڪمل طور تي فعال رهندو، جڏهن ته سڀني آفيسرن ۽ اهلڪارن جون موڪلون منسوخ ڪري کين فرائض جي ادائيگي لاءِ الرٽ رکيو ويو آهي۔ هن پوليس آفيسرن کي هدايت ڪئي ته عوام سان خوش اخلاقي سان پيش اچن ۽ ڪنهن به هنگامي صورتحال ۾ فوري ردعمل کي يقيني بڻائين۔
آخر ۾ اسسٽنٽ سپرنٽنڊنٽ پوليس سٽي سکر محمد صهيب امين شهرين کان اپيل ڪئي ته هو نئين سال جون خوشيون پرامن نموني سان ملهاين، قانون لاڳو ڪندڙ ادارن سان مڪمل تعاون ڪن ۽ شهر سکر کي امن جو گهوارو بڻائڻ ۾ پنهنجو ڪردار ادا ڪن۔
