سکر شهر ۾ کليل عام شراب فروشي جو ڪاروبار مبينا طور پوليس جي سرپرستي هيٺ جاري آهي، جنهن سبب شهرين ۾ سخت ڪاوڙ ۽ ڳڻتي پيدا ٿي وئي آهي۔ شهر جي مختلف علائقن ۾ شراب جا اڊا بنا ڪنهن خوف جي هلن پيا، جڏهن ته پوليس ۽ ضلعي انتظاميه جي خاموشي ڪيترن ئي سنجيده سوالن کي جنم ڏئي رهي آهي۔
مقامي ذريعن موجب رائل پلازا، تير چوڪ، ڳوٺ شالا جي سامهون ۽ ٻين اهم هنڌن تي شراب کليل عام وڪرو ڪئي پئي وڃي۔ شراب فروشي ۾ ملوث ماڻهن جو دعويٰ آهي ته هو مقامي پوليس کي ماهوار وڏي رقم ڏين ٿا، جنهن عيوض کين مڪمل تحفظ ڏنو وڃي ٿو ۽ ڪنهن به قسم جي ڪارروائي نٿي ڪئي وڃي۔
شهرين جو چوڻ آهي ته پوليس جي مبينا سرپرستي سبب هي غيرقانوني ڪاروبار ڏينهون ڏينهن وڌندو پيو وڃي۔ افسوسناڪ ڳالهه اها آهي ته مسلمانن ۾ به شراب نوشي جو لاڙو وڌي رهيو آهي، جڏهن ته عورتون ۽ ننڍي عمر جا ٻار به آساني سان شراب حاصل ڪري رهيا آهن۔ شهري حلقن موجب نوجوان نسل تيزي سان اخلاقي ۽ سماجي تباهي ڏانهن وڃي رهي آهي، ايتري قدر جو اسڪول ويندڙ ٻار به هن لعنت جي لپيٽ ۾ اچي رهيا آهن۔
علائقي وارن جو چوڻ آهي ته شراب نوشي جي وڌندڙ رجحان سبب گهريلو جهيڙا، تشدد، ڏوهن ۽ بدامني ۾ اضافو ٿي رهيو آهي، جڏهن ته تعليمي ۽ سماجي ماحول سخت متاثر ٿي چڪو آهي۔ والدين جو چوڻ آهي ته جيڪڏهن اهڙي صورتحال جاري رهي ته ايندڙ نسل کي بچائڻ ڏکيو ٿي ويندو۔
سکر جي شهرين، سماجي اڳواڻن ۽ معزز شهرين سنڌ جي وڏي وزير، آءِ جي سنڌ پوليس ۽ ٻين اعليٰ اختيارين کان مطالبو ڪيو آهي ته فوري نوٽيس وٺي شراب فروشي جا سڀ اڊا بند ڪرايا وڃن، پوليس ۾ موجود مبينا ڪاري ٻڪريُن خلاف سخت ڪارروائي ڪئي وڃي ۽ شفاف جاچ ذريعي حقيقتون عوام آڏو آنديون وڃن۔
شهرين جو چوڻ آهي ته جيستائين قانون لاڳو ڪندڙ ادارا پنهنجي ذميواري ايمانداري سان نڀائيندا نه، تيستائين شهر کي هن ناسور کان ڇوٽڪارو ڏيارڻ ممڪن ناهي۔ جيڪڏهن فوري ۽ اثرائتي ڪارروائي نه ڪئي وئي ته نوجوان نسل جو مستقبل سخت خطري ۾ پئجي ويندو۔
