پشاور: خيبر پختونخوا جي ضلعي ڪرم جي علائقي وسطي ڪرم ۾ شدت پسندن جي ٻن گروهن وچ ۾ ٿيل خطرناڪ هٿياربند جهڙپ دوران ڪمانڊر سميت 18 شدت پسند مارجي ويا آهن.
پوليس موجب فائرنگ ۽ هٿياربند تصادم جو واقعو وسطي ڪرم جي علائقي مناتو ڪامران ڪلي ۾ پيش آيو، جتي شدت پسند ڪمانڊر ڪاظم ۽ ممتاز امتي گروهن وچ ۾ سخت ويڙهه ٿي.
پوليس اختيارين جو چوڻ آهي ته ٻنهي ڌرين هڪ ٻئي خلاف ڳرا هٿيار استعمال ڪيا، جنهن سبب علائقي ۾ سخت خوف ۽ ڇڪتاڻ پکڙجي وئي.
حڪام مطابق مارجي ويلن ۾ مشهور شدت پسند ڪمانڊر ممتاز امتي به شامل آهي، جڏهن ته مارجي ويل شدت پسندن جا لاش مناتو ڪامران ڪلي واري علائقي مان هٿ ڪيا ويا آهن.
پوليس ذريعن موجب مقامي قبيلن لاشن کي کڻي تدفين جو عمل شروع ڪري ڇڏيو آهي. علائقي ۾ سيڪيورٽي فورسز به صورتحال تي ويجهي نظر رکي رهيون آهن ته جيئن وڌيڪ ڇڪتاڻ يا نئين جهيڙي کي روڪي سگهجي.
واضح رهي ته وسطي ڪرم ۽ ڀرپاسي وارن علائقن ۾ اڳ به شدت پسند گروهن جي موجودگي سبب ڪيترائي ڀيرا سيڪيورٽي آپريشن ڪيا ويا آهن. فورسز جي ڪارروائين دوران سوين شدت پسند مارجي چڪا آهن، جڏهن ته سندن ڪيترائي ٺڪاڻا ۽ تربيتي مرڪز به تباهه ڪيا ويا آهن.
سيڪيورٽي ماهرن موجب ضلعي ڪرم جا ڪجهه علائقا ڊگهي عرصي کان امن امان جي مسئلن کي منهن ڏئي رهيا آهن، جتي مختلف هٿياربند گروهن جي سرگرمين سبب صورتحال وقت بوقت خراب ٿيندي رهي آهي.
مقامي رهواسين علائقي ۾ پائيدار امن قائم ڪرڻ لاءِ وڌيڪ سخت سيڪيورٽي قدمن جو مطالبو ڪيو آهي ته جيئن عام ماڻهو خوف کانسواءِ زندگي گذاري سگهن.
