اسلام آباد: پاڪستان ۽ ڀارت وچ ۾ جوهري تنصيبات ۽ سهولتن جي فهرستن جو تبادلو ٿي ويو آهي۔
پرڏيهي آفيس جي ترجمان طاهر حسين اندرابي هفتيوار پريس بريفنگ دوران ٻڌايو ته نئين سال جي شروعات تي پاڪستان ۽ ڀارت وچ ۾ قيدين جي فهرستن جو به تبادلو ڪيو ويو۔ پاڪستان طرفان 257 ڀارتي قيدين جي فهرست جو تبادلو ڪيو ويو، جڏهن ته ڀارتي پرڏيهي وزارت ڀارت ۾ موجود پاڪستاني قيدين جي فهرست نئين دهلي ۾ پاڪستاني هاءِ ڪميشن جي نمائندي حوالي ڪئي۔
طاهر حسن اندراني ٻڌايو ته پاڪستان ۽ ڀارت وچ ۾ جوهري تنصيبات جي فهرست جو تبادلو به هر سال پهرين جنوري تي ڪيو ويندو آهي، ۽ هن سال به ٻنهي ملڪن هڪ ٻئي کي جوهري تنصيبات جي فهرستون فراهم ڪيون آهن۔
ان حوالي سان سفارتي ذريعن جو چوڻ آهي ته جوهري تنصيبات بابت معاهدي تي پاڪستان ۽ ڀارت 31 ڊسمبر 1988ع تي صحيحون ڪيون هيون، جنهن تحت ٻنهي ملڪن هر سال پهرين جنوري تي جوهري تنصيبات ۽ سهولتن جي فهرستن جو تبادلو ڪندا آهن۔
پرڏيهي آفيس جي ترجمان جو چوڻ هو ته پاڪستان يمن ۾ صورتحال کي معمول تي آڻڻ لاءِ علائقائي ڪوششن جو آڌرڀاءُ ڪري ٿو ۽ يمن جي تڪرار جي پرامن حل جي حمايت ڪري ٿو، جڏهن ته پاڪستان سعودي عرب سان مڪمل يڪجهتي جو به اعادو ڪري ٿو۔
هن وڌيڪ چيو ته پاڪستان اسرائيل طرفان صومالي لينڊ کي الڳ ملڪ طور تسليم ڪرڻ واري قدم کي مڪمل طور رد ڪري ٿو، ۽ پاڪستان صوماليا جي خودمختياري ۽ علائقائي سالمت جي حمايت جاري رکندو۔
